*Required
*Required
*Required
*Required
*Required
*Required
*Required
*Required
Send
Thank you for your application!
 

Aalisartut ukiuni 25-ni pinngortitarsiuuat

AnnDorte ataatsimeeqatigigaanni paasipallannartorujussuuvoq paasissutissat eqqortut, aalisartut aqqi, suliaallu ilisimalluarai

Seniorrådgiver ilisimatusartartorlu AnnDorte Burmeister pinngortitarsiuutut inaarutissaminik suliaqarnermini Pinngortitaleriffiup kilisaatitoqaanut R/V Pâmiut-nut ilaasimavoq, tassani raajanik misissuinernut ikiuutiutigaluni inaarutissaminut paasissutissanik katersuisimagami.

Tamatuma kinguninngua AnnDorte avatangiisinut pinngortitarsiuutut Roskilde Universitetimi allagartartaareeramili Pinngorititaleriffimmi saattussanut ilisimatusartartutut atorfinippoq. Taamaalinerani saattuarniarneq nutaajuvoq, AnnDortelu saattuanut alaatsinaatsuusussatut ineriartortitsisussanngorpoq, peqassutsimik naliliisartunngorluni saattussanullu tunngatillugu ilisimasanik nutaanik pissarsiortunngorluni. Tamatuma saniatigut Qaqortumiit Upernavik tikillugu misileraalluni saattuarniarnernut arlalinnut peqataasimavoq. Sulianilu taakkua aqqutigalugit sinerissami saattuarniarpassuarnik naapitaqartarsimalluni, aalisartulli ilaaffigalugit aamma saattuarniutaannut ilaalluni saattuarniaqataasarsimavoq. Tamakkua kingunerisaannik AnnDortep aalisartut aalisarnermillu inuussutissarsiuteqartut ilisimasaannut ataqqinnilluartunngorsimavoq, qularutiginngilluinnarlugulu suleqatigiinneq ilisimasanillu avitseqatigiinneq pingaaruteqarluinnartuusoq. Aamma ilaannikkut aalisartut pinngortitarsiuullu akunnerminni isiginnittaasiat assigiinngissinnaasaraluartorluunniit.

AnnDorte Burmeister Pinngortitaleriffik sinnerlugu pimoorussilluni aalisartunillu qanimut suleqateqarluni sulisimavoq. Ammasumik tikilluaqquserpalaartumillu pissuseqarpoq, peqqissaartuulluni, ataavartumillu paasissutissat eqqortut aalisartunut saqqummiullattaartuartarlugit. Paatsuugassaanngitsumilli kikkunnut tamanut ataqqinnittuugaluarluni malunnartarpoq uukapaatitassaanngilluinnartoq.  Taamaanneratalu aalisartut ikinngutaattut inissittarpaat, ukiunilu 25-ni sulisimanerata suleqateqarluartarsimaneratalu taamatut inissilluarsimavaat.

KNAPK-p siulittaasuata ukiuni arlalinni AnnDorte saattuarniartartuunermini kattuffimmilu siulittaasunngoreerluni suleqatigisarsimavaa.

– KNAPK-p AnnDortep ammasumik pissuseqarluni saqqummiussisarnera, paasiuminartumillu pissusilersortarnerata soorunalimi ilisimatuussutsikkut ilisimasani aallaavigalugit saqqummiussisarnera iluarisarpaa, immitsinnullu paaseqatigiittuaannarpugut.

Henrik Sandgreenip AnnDorte atuaruminartuummat, suut kissaatiginerai anguniagarineraalu aamma erseqqittarmata paasinartittaqaa.

– AnnDorte suleqatigigaangatsigu angusarissaartuaannarpugut, tamatta immikkut ilisimasatsinnik avitseqatigiissinnaasaratta, aamma paasilluartaramisigut ilisimasatsinnik avitseqatigiilluartarpugut.

Henrik Sandgreenip  saattuarniarnermi nalaani AnnDorte aamma suleqatigilluartarsimavaa, saattuarniartartullu nuannaralugu qinngasaalaarlugulu taasarsimavaat: AnnDorte Landkrabbe Burmeister!

 

AnnDorte suleqatimi akornganni aamma nuannarineqaqaaq:

– Inussiarnersuuvoq, pikkorilluni assullu oqaloqatigiuminarluni, taava aamma ningiorput peqanngikkaangat ningiorilertarparput, ningiuunerlu aamma iluatsilluartarpaa, teknikkikkut ataqatigiissaarisoq Louise Mølgaard oqarpoq.

Aasat tamaasa Sisimiut eqqaanni saattuat qanoq inissisimanerat alaatsinaanniarlugu misissuiartortarpoq, aalisartullu ataatsimeeqatigisarlugit. Maannakkullu Sisimiuliarnissaq piareersaleruttorpaa. Sofie Ruth Jeremiassenip AnnDorte ukiuni arlalinni angalaqatigisarsimagamiuk ataqqinerarpaa:

– AnnDorte pikkorissuuvoq piumasaqarnertuunullu ilaavoq. Suliassalli ingerlateqqinneqartarnerinut pikkoriffeqarpoq, arlaannik aaqqitassaqarpat taava qularutigisassaanngitsumik aaqqitassaq aaqqissimasarpaa. Aamma illarumatuujugami qanimut suleqatigalugu nuannertaqaaq.

Ukiut arlallit matuma siornatigut saattussanik suliaqarnera raajanik nunatsinni inuussutissarsiutit pingaarnersaannik ilaneqarpoq, raajanullu tunngasut piumassuseqarfigilluarlugit pikkoriffigalugillu suliarisimavai. AnnDorte Kitaata raajaanut ilisimasalissuuvoq piffissamilu annersaa raajanut tunngasunut atortarlugu. Raajaqassutsip nalilernissaanut siunnersuinermilu atugassanik, suleqatini marluk peqatigalugit suliaqartartuuvoq. Suliaasalu kingunerisaanik raajarniarneq MSC-mik ilisarnaasigaasimavoq.

AnnDorte aalisarnermik inuussutissarsiuteqartunik qanimut aamma suleqateqartartuuvoq, maannakkullu kilisaatini ristinut tunngasunik Polar Seafood aammalu Royal Greenland qanimut suleqatigai, taakkualu suleqatigiinnertik ima iluarisimaartigaat allaat nalunaarutigeqqammerlugu misileraanerit pingajussaannik ingerlatsillutik misileraaqqissinnaalluarlutik.

– Suleqatigiuminartorujussuuvoq – suleqatikkuminartuugami assullu suliaminut pimoorussisarluni – oqalunnikkaaqaaq assullu suleqatigalugu nuannerluinnarluni, Miki Brøns Andrias Olsen-ilu qaleriiaatiinnavillutik oqarput.

AnnDorte Burmeister maajip aallaqqaataani ukiuni 25-nngortorsiorluni nalliuttorsiorpoq, allagartaq uppernarsaat naasullu tunniunneqarput malunnartitsinermi marlunngorneq 19. maaji 2021.

AnnDorte qanga saattuarniartartunik Nuummi ataatsimeeqateqarnerani inuusuttunnguusoq takuneqarsinnaavoq.

AnnDorte Burmeister kulturip Unnuani aaqqissuussinermi saattuaq meeqqanut takutikkaa.

AnnDorte Burmeisterip ataatsimeeqatigai Andrias Olsen, (saamerlermi) Royal Greenland-imeersoq, kiisalu Miki Brøns (talerperlermi issiasoq) Polar Seafood-imeersoq. Ataatsimiinnermi misileraaneq suleqatigiissutigalugu ingerlatartik qalorsuit ristilersornerannut tunngasoq pingajussaanik ingerlateqqinneqarnissaa soqutigalugu eqqartorpaat.

AnnDorte Burmeister ukiuni 25-ni Pinngortitaleriffimmi Nuummiittumi atorfeqarpoq.

AnnDortep marlunngormat nalliuttorsiutigineqalaarnera peqataaffigineqarluarpoq.

AnnDorte pisortami oqalugiaataanut qujasoq.

2001-imi AnnDorte Burmeister Adolf Jensenimut ilaalluni misissueqataasoq.

2007-mi AnnDorte aammalu sulianik ataqatigiissaarisoq Sofie Ruth Jeremiassen suleqatigiillutik saattussanik uuttortaasut.