Inuit namminerminnut tunngasutigut aalajangiisinnaassusaannut ilisimatusarnerni Canada Nunarpullu siuttuusut Saqqummersinneqarfia 10.12.2021
Issittumi ilisimatusartartunut ukiup imaasinera immikkooruteqartarpoq. Maannami piffissanngorpoq ArcticNet-ip peqataaffiginissaa. Ataatsimeersuarnissaq ukiormanna ”ASM 2021” atserneqarsimasoq. Issittumi ilisimatusartarnerit pillugit Canadami ukiumoortumik ataatsimeersuarnerusarpoq.
Saqqummiussassat,t ilisimatusarnernilu suliat inerneri pillugit avitseqatigiinniarlutik ulluni makkunani peqataasut katersuutileruttoramik, , issittorlu pillugu nunarsuatsinni aaqqissuunneqartartut annersaasa ilaat malunnartinniarlugu ataatsimeersuartoqalermat.
ASM 2021”-mik taallugu kingullermik sapaatiummamiit una sapaatip akunnera naallugu aaqqissuussineq qarasaasiakkut ingerlanneqarpoq inunnillu 1000-nit ikinnerunngittunit nunaniillu 17-ineersunik peqataaffigineqarpoq. Ilisimatusartartut silarsuaanneersut ilisimatusartartut sulisullu, naalakkersuisut, avannaaneersut, nunap inoqqaavi aammalu naggueqatigiit inuit peqataaffigisaannik eqqartorneqarsimapput avatangiisinut, inuiaqatigiinnut, aningaasaqarniarnermut, politikkikkullu ajornartorsiutaasunut periarfissanullu tunngasorpassuit, issittormiummi nunaanni silap pissusiata allanngoriartornerata ineriartortitsinerullu nassatarisaanut tunngasorpassuit ataatsimeersuarnermi sammineqartaramik.
ArcticNet-ip naggueqatigiit inuit nunallu inoqqaavineersut aqutsinerat issittumilu ilisimatusarnermi aalajangeeqataasinnaanerat ataqqilluinnagaraa, ilisimatusarnermullu suliniut “Inuit Qaujisarnirmut Pilirijjutit”, naggueqatigiinnit inunnit tamakkiisumik aqunneqartoq akuersaarlugulu ataqqilluinnarlugu.
ASM2021-imi KNAPK-mi pisortap Bjarne ”Ababsi” Lyberth-ip Pinngortitaleriffimmilu postdoc-inngorniartup Victoria Qutuuq Buschman-ip oqallinnermi saqqummiussiffigaat ”sikoqarfiit kingullersaannut tunngasoq”, uumassusillit assigiinngiiaassusiannut piujuartitsiniarnermullu tunngasutigut, inuit namminneq aalajangiisinnaanerannut tunngasunut, assersuutaasinnaasullu arlallit taakkua saqqummiuppaat. Bjarne Lyberth-ip oqaluttuaraa Pikialasorsuup kulturikkut pingaaruteqassusia, Pikialasorsuup Kalaallit Nunaata Canadallu akornanni avannaatungaaniittuusup oqaluttuassartaa, inunnillu aqunneqartumik Pikialasorsuup Kommissioniani peqataasimanerminut tunngasunik oqaluttuarpoq. Victoria Qutuuq Buschman-ip, Alaskami Utqiagvik-meersup misilittakkani aallaavigalugit pissatsinnartumik saqqummiussivoq. Maluginiarneqarporlu oqarami: ”Silap pissusianut tulluarsaanissamut tunngatillugu suliniutinut Pikialasorsuullu piuinnarnissaanut tunngatillugu peqatigiikkutta iluatsitsisinnaavugut, peqatigiinnikuuvugut ataatsimoorlutalu suli iluatsitsiuarsinnaavugut.”
”ArcticNet-imi ataatsimiinnerit nuannarilluinnarpakka” Pinngortitaleriffimmi ilisimatusartartoq Caroline Bouchard qulissaa ASM-imi peqataasoq oqarpoq, tassami 2004-imi siullermeerluni peqataaqqaarsimagami.”Allaaneq ajorpoq sapaatip akunnera kaffisoriartorluni, ikinngutitoqqat, ikinngutitaallu naapissinnaajuarlugit, kissartortoqatigiittarluni nerilluartoqarsinnaasarlunilu, tassami coronaqanngikkallarmat nuannersoqangaarmat taamatut misinnartarsimagami”. Caroline Bouchard ASM sinnerlugu angallatit tingerlaatersortut umiatsiaaqqallu issittumi ilisimatusarnermi atorneqarsinnaaneri pillugit sammisaqartitsivoq.
Ilisimatusarnermi suliniutit arlalippassuit sumiiffinni nunaqartut aallartisarsimasaat saqqqummiunneqartaarput, taakkununnga ilaalluni Patrick Farnole, University of Victoria-mi ph.d.-nngorniartoq, taassuma suliaani aalisartut meeqqallu Uummannameersut immami uuttortaasarnermikkut ilisimatusartartunik ikiuunnerat ilaapput.
Sukumiinerusumik paasisaqarniaruit attavigisinnaavat:
Ilisimatusartartoq Caroline Bouchard, Silap Pissusianik Ilisimatusarfik, Pinngortitaleriffik, mail: cabo@natur.gl Oqarasuat 36 12 00.
