*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaanni imaani ilisimatusarnerni pissutsit nutaat atuukkaluttualeqaat

Kalaallit Nunaanni Namminersorlutik Oqartussat aatsaat taamak ilisimatusarnernut aningaasaliissuteqartigipput, nunatta imartaani ilisimatuussutsikkut misissuutissaq umiarsuaq nutaavissuaq, ateqartinneqalersoq ”Tarajoq” pisaarimmagu.

Umiarsuaq misissuutissaq nunatsinni nunarsuarmilu tamarmi Issittumi ilisimatusartarnerit eqqarsaatigalugit sannamigut nutaanik periarfissiissuteqartussaavoq. Raajat aalisagaqatigiiaallu allat aammalu silap pissusiata imaani avatangiisinut uumassuseqarnermullu sunniutaannik misissuisarnerit siunissami nukittorsaavigineqassapput. Umiarsuup Tarajup sananeqarnera naammassivoq, maannaqqissaarlu Norgemut ingerlaarpoq tassani nipiliornera uuttortarneqartussaagami, taamatut uuttortarneqarnissaa pingaaruteqarluinnarmat. Uuttortarneqareernermi kingorna Tarajup aalisarnermut atortussani Savalimmiunut aqqusaarniarpai.

Tarajoq Issittup imartaani angallassisarlunilu sullissisarnissaminut immikkut ilusiligaalluni sanaajuvoq. Umiarsuaq nutaaliarsuaq atortorissaarluinnartorlu 61 meterinik takissuseqarpoq. Angissutsimigut atortulersugaanermigullu ima pisinnaassuseqartigivoq avannamorsuaq ingerlaarsinnnaassuseqarluni, siuliminut sanilliulluni suliassanik allanik ilisimatusaatissat allat avatangiisinullu tunngassutilinnik suliassanik nutaarpassuarnik suliaqarsinnaalerluni. Tarajoq teknikkikkut atortorissaarutitigut kiisalu suliarerusussinnaasat allat nutaat eqqarsaatigalugit, imaanilu pisuussutit uumassusillit kalaallinut inuiaqatigiinnut pingaaruteqartorujussuunerannik taamaalilluni ersersitsisuuvoq.

Tarajoq Namminersorlutik Oqartussanit Aningaasaateqarfimmiillu Aage V. Jensens Fonde-mit aningaasalersugaavoq, 235 millioner koruuninillu akeqarluni. Norgemiittumit Skipsteksnisk AS- imit titartagaavoq amutsivimmillu Spaniamiittumit, BALENCIAGA-mit, sananeqarluni. Tarajoq Kalaallit Nunaanni Namminersorlutik Oqartussat sinnerlugit Pinngortitaleriffimmit ingerlanneqarlunilu akisussaaffigineqassaaq,

Tarajup ilisimatuussutsikkut Issittup imartaani suliassat suugaluartulluunniit naammassisinnaassavai, atortorissaarutinillu amigaateqarnani, soorlu makku: qalorsuarnik natersiutinik kalissinnaavoq, qalut immap ikerani aalisarnernut atortut atorlugit immap ikerani aalisarsinnaavoq, atortorissaarutit nutaaliaasut atorlugit aalisagaqatigiiaat amerlassusiat oqimaassusinngorlugu uuttortarsinnaavai aammalu immap naqqa kilometerini arlalialissuarni sukumiisorujussuarmik assiliortorsinnaassavaa nunap assiatullu assiliorneqarsinnaalersillugu – taama ittut ilisimatusartartunut, aalisartunut umiarsuarniillu angallassissutinit iluaqutigineqangaartussanik.

Umiarsuaq Tarajoq inuttanik aqqaneq marlunnut inissaqartitsivoq, ilisimatusartartut 20-t saniatigullu Imarsiornermik Ilinniarfimmiit ilinniartunik ilaasoqartarsinnaassalluni.

Kalaallit Nunaat maannakkut umiarsuarnik ilisimatuussutsikkut misissuutinik marlussuarnik peqalerpoq, ukiorpassuarnilu imaani uumassuseqassutsimik malittarinninneq ilisimatusarnerillu tamaalillutik ingerlaqqissinnaanngussapput: Tarajup misissugarissavai sinerissap avataaniittut aalisakkat pingaarutillit soorlu qalerallit, saarulliit aammalu immap naqqanik ilisimatusaatigalugu uuttortaasarnerit, Sanna-llu pisarneq malillugu Kalaallit Nunaata sineriaa atuarlugu peqassutsit sinerissap qanittuiniittut misissuiffigisassavai.

Sukumiinerusumik paasisaqarusuttunut saaffigisassaq:

Pinngortitaleriffimmi Aalisakkanut Qalerualinnullu immikkoortortaqarfimmi pisortaq, Helle Siegstad oqara. 583155, e-mail helle@natur.gl

 

Kisitsit pingaarnerit

Bruttotonnage 2.841
Nettotonnage 852
Takissuseq 61,4 m
Silissuseq 16,0 m
Itsinera 6,4 m
Sukkas. nalingin. 14 knob
Kalissinn. >50 tons
Imma. uninnga. >40

Boas Augustussenip Tarajoq-mi erfalasoq qullaraa.