Kalaallit Nunaat Ph.d.-limmik pisuunnguallappoq Saqqummersinneqarfia 16.06.2021

Ilisimatusartartup Aili Lage Labansenip Pinngortitaleriffimmeersup ullumikkut Kalaallit Nunaanni appanut tunngasumik Ph.d. ilisimatuutut allaaserisani illersorpaa. Ilisimatuussutsikkut allaaserivaa appat nunatsinni piaqqisarfimminni piaqqinerini appaqassutsimullu pingaaruteqartut taaguutilerlugu: ”Makin’ some noise – A study of anthropogenic threats to thick-billed murre (appa, Uria lomvia) in Greenland”.

Aili Lage Labansenip ilisimatuutut allaatigisaqarnermigut piorsaaqataavoq ilisimatuussutsikkut piujuartitsiniartumik uumassuseqartunillu atuinissamut uumasoqatigiiaallu assigiinngiiaassuseqarnerinut iluaqutaasussanik suliaqarnermigut. Kalaallit Nunaanni ilisimatuussutsikkut piginnaaneqassuseq Aili Lage Labansenip siumut alloriarteqqippaa pinngortitamullu tunngasutigut ilisimatuussutsikkut piginnaanerit nunatsinneereersut pitsaanerulersillugit.

”Pinngortitaleriffimmut ulloq pingaaruteqaqaaq, neriuutigaaralu Aili Lage Labansenip maligassiuinermini Kalaallit Nunaanni inuusuttut amerlanerit pinngortitamut tunngasutigut ilisimatusarnermut tunngasunik ilinniagaqarnissaannut kajuminnerulersissagai” pisortaq Klaus Nygaard oqarpoq.

Aili Lage Labansenip ilisimatusartartutut ilinniarnera Pinngortitaleriffiup piginnaanngorsaalluni pilersaarutaanut ilaavoq, qallunaallu nunaanni issittumi ilisimatusarnermut atugassanik aningaasalersorneqarluni. Aili Lage Labansenip Pinngortitaleriffimmut tunngasutigut Ilisimatusarlutik ilisimatuussutsikkut allaaserisaqarsimasut 21-ssaraat.

Aili Lage Labansen, Aarhus Universitet-imi ilinniartutut allassimavoq, illersuinissarlu nalinginnaasumik tassani pisussaagaluartoq Covid-19 pissutigalugu taarsiullugu Pinngortitaleriffiup illorsuaataani Pikialaarfimmi pivoq.

Aili Lage Labansenip ilisimatuussutsikkut allaaserisaa tamakkerlugu atuarneqarsinnaavoq UANI

Itinerusumik paasisaqarniaraanni attavissaq:

Ilisimatusartartoq Aili Lage Labansen, mail: aila@natur.gl, oqarasuaat +299 36 12 00