Sortehavimiit nunatsinnut Saqqummersinneqarfia 18.08.2021

Timmiaaraq una qallunaatut rosenstær-imik taaneqartartoq aatsaavissuaq nunatsinniittoq takuneqarsimavoq. Jâkúnguaq Skadep timmiaaraq Aasianni aggustip 12-iani 13-ianilu takusimavaa, qujanartumillu assileriarlugu Pinngortitaleriffimmut assinga nassiullugu.

Rosenstæri angissusia qupaloraarsummut sanilliullugu ima isikkoqarpoq. Assiliisoq Jaakunnguaq Skade

Timmiaaraq ”rosenstær” ivigaqarfissuarni Sortehavip kujataaniittuni piaqqisarpoq Indiamilu ukiisarluni. Timmiaaraq taanna najukkaminiit ungasissorujussuarmut pisarnera ilisimaneqareerpoq – nalinginnaasumillu Skagen-imi Danmarkip avannaa-tungaani upernaakkut takuneqartarpoq, soorluttaaq Europami allani naammattoorneqartarsimasoq, aammattaaq Savalimmiuni Islandimilu takuneqartareerpoq. Jâkúnnguup assitigut uppernarsagaatulli aatsaavissuaq Kalaallit Nunaannut anngussimavoq Indiami ukiiffimminiit naannerpaamik 10.000 km-inik ungasitsigisumut apuussimasoq.