*Required
*Required
*Required
*Required
*Required
*Required
*Required
*Required
Send
Thank you for your application!
 

Eqalussuit qernertut piaqqiarineqartut Saqqummersinneqarfia 25.10.2022

Eqalussuaq Fabricius’-ip eqalussua qeernertoq qaleralinnik misissuinerni pisarikkajunneqartarpoq Nunatta Kitaani Kangianilu nunattalu eqalussuaani tullersortitut imartasinni pisarineqartarluni. Eqalussuit qernertut 90 cm-it missaat angullugu angissuseqalertarput qernertuunertillu ilisarnaatigisarpaat soorluttaaq avaleraasai tamarmik kapinartoqartarlutik, taamaattumillu ilisariuminartorujussuusarluni. Allamulli eqalussuarmik qaamasumik taaneqartartumut paarlaanneqarsinnaasarpoq, taannalu Kalaallit Nunaata eqqaani qaqutigoortorujussuuvoq, eqalussuartummi qernertutut qalipaateqarlunilu avalerai aamma kapinartoqartaramik. Eqalussuarli qaamasoq allaanerujussuarnik kiguteqartarami ilisariuminartorujussuusarpoq.  Eqalussuit qernertut Kalaallit Nunaata imartaani itissutsini 700-900 meteriniittuni pisarineqaqqajupput kilisaammilli pisarineqarnertik aniguiffigisinnaaneq ajoramikku toqqutigisarpaat.

Aalisakkat amerlanerpaat suffisartut eqalussuit amerlanerpaartaat piaqqisarput. Eqalussuaq qernertoq aamma piaqqisarpoq, ukioq mannalu piaqqinissaminnut inerissimasunik arlalinnik pisaqarpugut, allaallu ilumittunik pisaqarluta. Eqalussuit ilumittut paasinarsisippaat piarassaat arnamik iluanni qanoq inerikkiartortarnerinik. Manniit/Suaat kinguaassinneqaraangamik eqalussuup illiaanukartarput. Piaqqallu manniup sungaartortaannaanik uumassutissalersorneqarlutik ineriartortarput. Uumassutissaq tamarmi nungukkaangat piaqqat 15-19 cm-inik angissuseqalersimasarput, tamatuma kingorna piaqqiarineqarnissaminnut piareertarlutik. Eqalussuaq ilumittoq pisarineqaraangami imaluunniit uumaannarnissaminut ulorianartorsiortinneqaraangami, taava annaffissatullusooq timaa qisuariartarpoq, tassa ernilluni aallartittarami. Taamatullu periuseqarneq eqalussuarni arlalinni takuneqartarpoq. Eqalussuit qernertut ilumittut aamma taamaattarput. Piaqqat uumasinnaasarput immamullu ikillugit uumatissinnaasarpagut. Piaqqat nalussinnaasut imaanut aniguisinneqarput. Fabriciusip eqalussuaa qernertoq 40it tikillugit amerlassusilinnik piaqqisinnaasarpoq, nalinginnaanerpaamilli 16inik amerlassusilinnik erninermi ataatsimi piaqqisarluni. Arnaviaq angisuujugaangami amerlanernik piaqqisinnaanerusarpoq. Fabricius’ip eqalussuaa qernertoq Atlantikup avannarpasissuani aarlerinaateqanngitsutut inissisimavoq.

Eqalussuup qernertup piaraa erniarineqaqqammersoq. Niaquanniipput maluginiutai elektroniskitulli pisariniakkamik qanitsillutik nukiminnik aalatitsinerinik malussartartut. Assiliisoq: Julius Nielsen.

Eqalussuarnik qernertunik arlalinnik pisaqarneq misissuiffigineqartoq. Assiliisoq: Julius Nielsen.

Piarassaq manniup sungaartortalik. Piaqqat taamatut angissuseqaraangamik nalussinnaasarput taamaattumillu imaanut utertinneqartarlutik. Assiliisoq: Julius Nielsen.

Eqalussuaq qernertoq piarassanik inerissimasunik 27-inik naarmiulik. Piaqqat uumammata assilineqareermata imermut immameersumut ikineqarput. Assiliisoq: Julius Nielsen.

Eqalussuup piarassai suli inerivinngitsut. Assiliisoq: Julius Nielsen.

Piarassat naarmiorineqartut assigiinngitsunik angissusillit. Eqalussuarnik assigiinngiiaartuneersuupput. Assiliisoq: Julius Nielsen.

Arnaviaq ilumittoq, piarassai tamarmik assigiiaartumik angissuseqartut. Assiliisoq: Julius Nielsen.

Eqalussuup qernertup piarassaa. Assiliisoq: Julius Nielsen.

Qullermi: Fabricius’ip eqalussuaa qernertoq suli ammarterneqanngitsoq. Qiterleq: Arnaviaq inerisimasoq mannissaqarfimmini kinguaassineqarnissaminut piareersimasoq. Arnaviaq una taamaattumik naartunngilaq/iluminngilaq. Allermi: Arnaviaq ilumittoq kinguaassineqaqqammersunik sualik/mannilik. Manniit/suaat marluk suli iluaniittut arnavissap timaanik milluarneqalertussaapput, uumassutissartai sumiginnartinniarnagit. Assiliisoq: Julius Nielsen.

Qullermi: Arnaviaq ilumittoq suai piarassanngoriartortut. Qeqqani: arnaviaq ilumittoq piarassai inerinnissaminnut aqqutaa qiteqqukkaat. Allermi: arnaviaq ilumittoq piarassaasa manniup sungaartortaata uumassutissartai nungulluinnaleraat. Assiliisoq: Julius Nielsen.

Qullermi: illissami suaat kinguaassinneqaqqamminerusut. Qiterlermi: Illuaq piarassalik piaqqiarineqarnissaminnut piffissaq qiteqquteqqagaat. Allermi: Piarassat inerinnissaminnut piffissaq qiteqqukkaat. Illiap aappaa imaarneqarsimavoq, piarai anillatsinneqarsimallutik. Assiliisoq: Julius Nielsen.

Saamerleq: Fabricius’ip eqalussuaata qernertup niaqua ataatungaaniit assilisaq. Talerperleq: Eqalussuup qaamasup qaqutigorsuaq Kalaallit Nunaata imartaani naammattoorneqartartup niaqua ataatungaanniit assilisaq, tassa eqaluussuarmut qernertumut taanna paarlaanneqarsinnaasoq. Assiliisoq: Inaluk Jacobsen.