Ilinniartunut kalaallinut periarfissatsialak Saqqummersinneqarfia 07.01.2022

Pinngortitaleriffik Aarhus Universitet-ilu suleqatigiillutik Nuummi Pinngortitaleriffimmi aasaanerani marloriarlutik pikkorissaaniarput augustimi 2022-mi. Pikkorissarnissat taakkua marluusut ingerlanneqarsinnaalersimapput UArctic-imik aningaasaliiffigineqarnermikkut. Ilinniartullu kalaallit peqataanissaminnut tikilluaqqusaalluinnarput.

Climate change Effects on Nature and Society in the Arctic pikkorissarneruvoq ph.d-tunut kandidatinngorniarlutillu ilinniartunut saaffiginnittoq, 2022-imi upernaakkut qarasaasiatigut ilinniarneq ingerlanneqariarluni taava 22.-31. aggustimi pinngortitami suliaqarfiusussaasoq.

Kalaallit Nunaanni silap allanngoriartornera paasiniarneqartussaavoq pinngortitamiinnertigut kulturikkullu pingaaruteqartut sumiiffiit najornerisigut, qanga pisimasut maannakkut pisimasunut attuumassuteqartinniarneqassapput, “øko-historie” maannakkut avatangiisiusut siunissamilu avatangisiusussat samminerisigut. Pikkorissarnermi pinngortitaq najorneqartartussaavoq aammali laboratoriani, atuartitsivinni oqallinnernilu ingerlanneqartassalluni. Assersuutigalugu angalasoqartartussaavoq, sumiiffinni pinngortitap ataqatigiissaarnerinik, nunallu kulturimut pingaarutillit takornariarnerisigut, inuiaqatigiinnillu ilisimasaqarluartut qangaaniilli ilisimariikkanik saqqummiussissapput, silallu allanngoriartorneranut tunngatillugu isummersortussaallutik.

Peqataaniaraanni nalunaarnissamut killeritinneqarpoq 1. marts 2022.

Pikkorissarneq Plastic in the marine Arctic – from sources to solutions ingerlanneqartussaavoq ulluni 1.-5. aggustimi, tassanilu ph.d-ngorniartut, kandidatitut bacheloritullu ilinniartut piukkunnartut peqataasinnaatitaapput. Najugaqavissut kattuffiilluunniit plastikkinut tunngasunik suliniuteqartut peqataanissaminnut aamma tikilluaqqusaapput. Ilisimatusarfimmilu ilinniartut peqataagunik peqataanertik 5 ECTS point-inik pissarsissutigisussaavaat.

Imaani mingutitsinerit suminngaaneernersut pikkorissartut immikkoortissinnaanngorlugillu paasisimasaqarfigilertussaassavaat mingutitsisullu qanoq annertutigisumik minguttitsinersut nalilersortussaallugit. Pinngortitalerinermi inuiaqatigiilerinermilu ilisimatuussutsikkut periutsit ingerlatseriaatsillu atorneqartussaapput, sumiiffimmeersut atorlugit ajornartorsiutillu ilisimaneqalernissaat anguniarneqassalluni. Atuartitsinerit, pinngortitami misissuinerit laboratoriamilu suliaqarnerit saniatigut eqqartueqatigiinnerit sumiiffimmeersunik suleqateqartitsinerit ingerlanneqartussaapput.

Peqataarusuttut nalunaarnissaannut killeritinneqarsimavoq 15. januar 2022.

Pikkorissarnissat sukumiinerusumik paasisaqarfiginiaranni uani paasisaqartoqarsinnaavoq www.gcrc.gl/education/summer courses 2022.