*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaanni imaani ilisimatusarnerni pissutsit nutaat atuukkaluttualeqaat Saqqummersinneqarfia 26.04.2022

Tarajoq ullumi marlunngornermi Nuummut tikissaaq nal. 15. Kalaallit Nunaanni Namminersorlutik Oqartussat aatsaat taamak ilisimatusarnernut aningaasaliissuteqartigipput, nunatta imartaani ilisimatuussutsikkut misissuutissaq umiarsuaq nutaavissuaq, ateqartinneqalersoq ”Tarajoq” pisaarigamiuk.

Umiarsuaq misissuutissaq nunatsinni nunarsuarmilu tamarmi Issittumi ilisimatusartarnerit eqqarsaatigalugit sannamigut nutaanik periarfissiissuteqartussaavoq. Raajat aalisagaqatigiiaallu allat aammalu silap pissusiata imaani avatangiisinut uumassuseqarnermullu sunniutaannik misissuisarnerit siunissami nukittorsaavigineqassapput.

Tarajoq Issittup imartaani angallassisarlunilu sullissisarnissaminut immikkut ilusiligaalluni sanaajuvoq. Umiarsuaq nutaaliarsuaq atortorissaarluinnartorlu 61 meterinik takissuseqarpoq. Angissutsimigut atortulersugaanermigullu ima pisinnaassuseqartigivoq avannamorsuaq ingerlaarsinnaassuseqassalluni, siuliminut sanilliulluni suliassanik allanik ilisimatusaatissanillu allanik avatangiisinullu tunngassutilinnik suliassanik nutaarpassuarnik suliaqarsinnaavoq. Tarajoq teknikkikkut atortorissaarutitigut kiisalu suliarerusussinnaasat allat nutaat eqqarsaatigalugit, imaanilu pisuussutit uumassusillit kalaallinut inuiaqatigiinnut pingaaruteqartorujussuunerannik ersersitsisuuvoq.

Tarajoq Namminersorlutik Oqartussanit Aningaasaateqarfimmiillu Aage V. Jensens Fonde-mit aningaasalersugaavoq, 235 millioner koruuninillu akeqarluni. Norgemiittumit Skipsteknisk AS-imit titartagaavoq amutsivimmillu Spaniamiittumit, BALENCIAGA-mit, sananeqarluni. Tarajoq Kalaallit Nunaanni Namminersorlutik Oqartussat sinnerlugit Pinngortitaleriffimmit ingerlanneqarlunilu akisussaaffigineqassaaq.

Kisitsisit pingaarnerit

Bruttotonnage: 2841
Nettotonnage: 852
Takissuseq: 61,4 m
Silissuseq: 16,0 m
Itsinera:   8 m
Sukkas. nalingin: 14 knob
Kalitsisinnaassusaa: >50 tons
Imma. uninnga.: >40

 

Taratsup ilisimatuussutsikkut Issittup imartaani suliassat suugaluartulluunniit naammassisinnaassavai, atortorissaarutinillu amigaateqarnani, soorlu makkuninnga: qalorsuarnik natersiutinik kalissinnaavoq, qalut immap ikerani aalisarnernut atortut atorlugit immap ikerani aalisarsinnaavoq, atortorissaarutit nutaaliaasut atorlugit aalisagaqatigiiaat oqimaassusinngorlugu amerlassusiat uuttortarsinnaavai aammalu immap naqqa kilometerini arlalialissuarni sukumiisorujussuarmik assiliortorsinnaassavaa, nunap assingatullu assiliorneqarsinnaalersillugu – tamakkulu ilisimatusartartunut, aalisartunut umiarsuarniillu angallassissutinit iluaqutigineqangaartussaapput.

Umiarsuaq Tarajoq inuttanik aqqaneq marlunnik inissaqartitsivoq, ilisimatusartartut 20-t saniatigullu Imarsiornermik Ilinniarfimmiit ilinniartunik ilaasoqartarsinnaassalluni.

Kalaallit Nunaat maannakkut umiarsuarnik ilisimatuussutsikkut misissuutinik marlussuarnik peqalerpoq, ukiorpassuarnilu imaani uumassuseqassutsimik malittarinninneq ilisimatusarnerillu tamaalillutik ingerlaqqissinnaanngussapput: Taratsup misissugarissavai sinerissap avataaniittut aalisakkat pingaarutillit soorlu qalerallit, saarulliit aammalu immap naqqanik ilisimatusaatigalugu uuttortaasarnerit, Sannalu pisarneq malillugu Kalaallit Nunaata sineriaa atuarlugu peqassutsinik sinerissap qanittuiniittunik misissuisuusussaavoq.

Tarajoq Norgemi nipiliornera uuttortartereerluni, immallu naqqanik assiliuutaasinnaasoq, multibeam-eq ikkussortikkiartoreerlugu, tamatumalu siuliani aalisarnermut atortussani aallugit Savalimmiunut aqqusaareerpoq.

Tusagassiuutilerisut kingusinnerusukkut umiarsuarmut pulaaqqusaajumaarput Taratsumi ikkussugassat kingulliit piareereerpata.

Sukumiinerusumik paasisaqarusuttunut saaffigisassaq: Pinngortitaleriffimmi pisortaq, Klaus Nygaard oqara. 361200, mail: nygaard@natur.gl.