Nuummi takornariaqarneq pillugu isummatit tusartikkit Saqqummersinneqarfia 17.05.2022
Nuummi eqqaanilu takornariaqarnerup pinngortitamut kulturimullu sunniutai Pinngortitaleriffimmit misissuiffigineqalerput. Sunniutaasinnaasut paasinissaat pingaaruteqarpoq, takornariaqarnerup atuilluartuunermik tunngaveqartumik ineriartortinneqarnissaa qulakkeerneqassappat.
Misissuinermi susassareqatigiit assigiinngitsut akuutinneqassapput, takornariaqarnerup nunaqqatigiinnik, atuilluarnermillu tunngaveqartumik annertunerusumik ineriartorteqqinneqarsinnaanera paasiumallugu. Sumiiffimmi susassareqatigiit akuutinneqarnissaat annertusarniarlugu ilisimatusarnikkut periutsit akuutitsisut assigiinngitsut atorneqartussat tassaapput apersuinerit, Public Participation GIS (PP-GIS) aammalu siunissami periarfissaasinnaasunik ujartuilluni immersoqatigiiffiusumik ataatsimiinnernik ingerlatsisoqartassaaq.
”PP-GIS-ikkut misissuineq online-kkut ingerlanneqarluni maana aallartippoq. Misissuinermi apersuutigineqassapput Nuummi nunaqavissut takornariaqarnerup pinngortitamut, kulturimut, inuiaqatigiinnut, aningaasaqarnermullu sunniutit suut maluginiarneqanersut.
Saniatigut soqutiginnittut nunap assinganut sumiiffiit ilaat takornariaqarnikkut aaqqissuussiffigineqarnissamut piukkunnartut pillugit innersuussisoqarsinnaavoq, imalunniit muminganik aaqqissuussiffigineqassanngitsutut nunap assinganut nalunaarsuisoqarsinnaavoq”, taama oqarpoq ilisimatusartartoq Kristine Lynge-Pedersen.
Peqataaneq ajornanngitsuararsuuvoq. Una linki tuuginnassavat: https://arcg.is/090nqG
Online-kkut misissuineq marlunngorneq Maajip 31-at 2022 tikillugu ingerlanneqassaaq.
Ilisimatusartartut suliniummik ingerlatsisuusut neriupput sapinngisamik innuttaasut amerlasuut, inuussutissarsiummik ingerlateqartut, kommunalbestyrelsimi ilaasortat, atorfillit, soqutigisaqaqatigiiffiit Nuummilu peqatigiiffiit misissuinermi peqataalluarumaartut.
EU-mit aningaasalerneqartup Horizon 2020-p ataani ilisimatuussutsikkut suliniut “ArcticHubs Nunarsuarmioqatigiit kattullutik nukimmik pilersitseqatigiinnerisa sumiiffigisanut sunniutaat” pilersinneqarpoq. Uani sukumiinerusumik paasiniaaffigineqarsinnaavoq: www.luke.fi/arctichubs
Sukumiinerusumik paasisaqarniaraanni attavigisassaq:
Kristine Lynge-Pedersen, tlf. 361218, krlp@natur.gl
Aaju Simonsen, tlf. 361286, ascs@natur.gl
Debora Hansen Kleist, tlf. 361257, deha@natur.gl
