Tunumi aalisakkat anorersuarlu Saqqummersinneqarfia 04.10.2022
Allallunilu assiliisoq Julius Nielsen.
Pinngortitaleriffimmeersut Tarajoq ilaaffigalugu Tunumi ukiumut siullermeersumik qaleralinnik misissuinerit ingerlatileruttorpaat. Sapaatip akunnerisa marluk affaallu missaanni immap naqqata nunavimmut atasortaata sivingaffiata kujammut kangisinnerusortaani Tasiilallu eqqaani itisooqarfinni Dorhnillu ikkannersaqarfiata ungasinngisaani Islandip killeqarfia tikillugu sumiiffimmi annertuumi misissuisoqassaaq. Tamaani kilisattarfiit 60-it 400-1500 meterinik itissusilinniittut aalisarfigineqassapput.
Qalerallit pinerullugit misissuisoqassaaq, aalisakkalli allat, soorlu suluppaakkat, tupissutit allarpassuillu aammali qaleruallit amikullu ilanngullugit misissuiffigineqassapput. Angalanermi immap naqqa sukumiisumik misissuiffigineqassaaq, kilisaatersortoqartarnera uumassusilinnut natermiunut qanoq sunniuteqartarnersoq ilisimasaqarfiginerulerniarlugu.
Misissuilluni angalaneq kinguaattoorluni aallartinneqarpoq Tunup kitaani sakkortuumik anorersuaqattaarnera pissutaalluni, ullunili kingullerni anori sakkukillisimavoq, kiisami aalisarneq aallartilluarneqarsinnaanngorluni. Ullut siullialuit suluppaakkat, tupissutit allernallu angisuut 20 kg-ngajammik oqimaassusillit amerlasuut aalisarneqarput.
Sapaatip-akunnerini tulliuttuni angalanermiit paasissutissiillattaartoqarumaarpoq.
Assit toorlugit angisuunngorlugit takusinnaavatit.
-
- Tunumi misissuineq. Toornerit aappaluttut tassaapput misissuiffissatut pilersaarutigineqartut, titarnerlu qorsuk tassaavoq angalanermi aqqutiginiarneqartoq.
-
- Anorersuarnerata misissuilluni angalanissaq kinguaattoortippaa. Tarajoq assimi tungujortumik qalipaatilimmi anoreqannginnersamiippoq.
-
- Suluppaakkat pisarineqartut.
-
- Tunumi qattungallatsiarnerani assilisaq.
-
- Uumassusilerituut pisat qaqinneqarnissaannut utaqqisut.
-
- Tupissutit suluppaakkallu pisarineqartut.
-
- Aalisakkat pisarineqartut tamarmik suussusersiorneqarlutillu angissutsimikkut uuttortarneqartarput.
-
- Immap naqqata uumasuinik immikkoortiterisut.
-
- Immikkoortiteriikkat.
-
- Aalisakkat kilisanneqartut.
-
- Eqalussuup nulia 20 kg-ngajammik oqimaassusilik nalunaaqutsersinnarlugu immamut ingerlateqqinneqarpoq.
