Ilisimatusarnermi atortorissaarut Nuup Kangerluani immikkut suliassaqarluni aallartitaq Saqqummersinneqarfia 23.06.2023

Immap kissassusia tarajoqassusia allarpassuillu nalunaarsorneqarsinnaasarput
Misissuutigisatta sumiiffigisimasaasa nalunaarsorneqarnerat

Naammattuussagukku uninngatiinnariuk – annertuumik immikkut suliassaqarluni sulivoq.

Ilisimatuutut misissuisut Kalaallit Nunaanni Silap Pissusianik Ilisimatusarfianeersut, Kalaallit Nunaanni Pinngortitaleriffik, ilisimatusarnermi atortorissaarummik Nuup Kangerluanut ningitsisimapput. Atortorissaarut APEX-imik taaneqartartoq immap kissassusaanik nillissusaanillu aamma tarajoqassusaanik uuttortaasarpoq. Taakku saniatigut misissuut imermik immertagaq immeriarlugu qanoq annertutigisumik ilt-eqartigineranik aamma fluorescens-eqartigineranik (naasunik immap ikerinnaaniittunik takutitsisinnaasoq) uuttortaasarpoq. Atortorissaarut imermik immertakkami qummut ammullu nammineq ingerlasarpoq immallu naqqaninngaanniit 50 meterinik qullasitsigisumi annerusumik uninngasarpoq. Immap qaavanut ulloq allortarlugu pisarnissaanik programmererneqarsimavoq. Qummut ingerlanermini uuttortakkanik katersisarpoq. Taamaalilluta imermik immertagaq tamaat paasissutissanik imalik pisinnaanngortarparput. APEX immap qaavanut pigaangami paasissutissanik ilisimatuutut misissuisunut qaammataasakkut nassitsisarpoq. APEX  ukiut marluk sinnerlugit paasissutissanik ataavartumik katersisinnaavoq – aamma ukiukkut sikup ataani. Immap kissassusaanik tarajoqassusaanillu ataavartumik nakkutiginnilluni misissuinerit Kalaallit Nunaanni sermersuit aakkiartortarnerisa paasisaqarfiginissaannut aamma siumut takorluuisinnaanermut pingaaruteqarput. Nuup Kangerluani sermersuaq Narsap Sermia ukiuni qulikkaani kingullerni tunuariartulersimavoq. Suliniummi tassani paasissutissat katersorneqartut atorlugit sermersuup qanoq aamma sumik peqquteqartumik tunuariartornerani pisoqartarneranik paasisaqarnissarput neriuutigaarput, erngup kissartup kangerlummut assartorneqartarnera ilanngullugu.

APEX piffissap annersaani immap naqqata nalaaniittarpoq, taamaattumik takunissaanut periarfissaq annikitsuararsuuvoq. Iluanaarlutilli immap qaavaniittoq takussagaluarukku qinnuigissavatsigit uninngatiinnaqqullugu – paasissutissanik pingaarutilinnik nassiussuimmat aqqaqqingajalermallu.

Suliniut Jet Propulsion Laboratory-mi (NASA) suleqatigalugu ingerlanneqarpoq.