Klaus Nygaard Pinngortitaleriffimmi pisortatut suliunnaarpoq Saqqummersinneqarfia 31.08.2023
Klaus Nygaard Pinngortitaleriffimmi ukiuni 30-ngajanni pisortaareerluni suliunnaartussanngorpoq. Klaus Nygaardip sulinini 1982-imi aallartippaa, taamani ilinniartuulluni ikiortitut naalagaaffiup suliffeqarfiutaani Kalaallit Nunaanni Aalisarnermik Avatangiisinillu Misissuisoqarfimmi aallartissimavoq, kingornatigullu 1984-imi avatangiisinut pinngortitarsiuutut Kalaallit Nunaanni erngup nukinganik nukissiuuteqarnerup ineriartortinneqarneranut atatillugu suliaqartussatut atorfinitsinneqarsimalluni.
Klaus Nygaard Kalaallit Nunaanni Aalisakkanik Misissuinerit misissuivianni ilisimatuussutsikkut misissuinernut aqutsisutut 1987-imi atorfinippoq, suliffeqarfillu Namminersorlutik Oqartussat 1989-imi tigummassuk kingornatigut nooqataasimalluni. Kalaallit Nunaanni Aalisakkanik Misissuinerit Københavnimiittoq pillugu oqartussaaffik Kalaallit Nunaanni Naalakkersuisut tigujumallugu aalajangermata Klaus Nygaard pisortatut 1.1.1993-imi atorfinitsinneqarpoq. Suliffeqarfiup Kalaallit Nunaannut nuunnissaa suliassat siullersarisimavaat, Pinngortitaleriffiullu 1995-imipilersinneqarnissaanut suliniutit tullinnguussimapput.
Takorluugaqarsinnaanini aamma Aage V. Jensenip aningaasaateqarfianit aningaasaliissuteqarnissaanut uteriinnini iluaqutigalugit ilisimatuut suliffeqarfiit arlallit sanaartortitsisutut akisussaaffigai, ilaatigut Nuummi illorsuit angisuut tallimat. Umiarsuaq misissuut ”Sanna” suliffeqarfiup 2012-imi pigilerpaa, massakkullu aamma umiarsuaq misissuut nutaaliaanerpaaq atortorissaarutigissaaqisorlu ”Tarajoq” aamma pigilersimallugu.
”Pinngortitaleriffiup sukkasuumik ineriartornerani inupparujussuit suliniuteqaqataasimapput, illuutit eqqarsaatigalugit aammali ilisimatusarnerup tungaatigut.
Ukiut amerlasuut ingerlaneranni ineriartornermi siuttutut inissisimasimanera immikkut ittumik pisinnaatitaaffiliinertut isigaara”, Klaus Nygaard oqarpoq.
Josephine Nymand pisortatut septemberip aallaqqaataani sulilissaaq, Klaus Nygaardilu suliffeqarfimmi pisortaqatiigiinnut siunnersortitut ingerlaannassaaq, pingaartumik aningaasaqarnermut tunngasutigut suliassat eqqarsaatigalugit.
Annertunerusumik paasisaqarusukkuit saaffissaq: Klaus Nygaard nygaard@natur.gl, telefon 361200
