Niisarnaq

Niisarnat Norgemiut. Asseq: F. Ugarte

 

Globicephala melas

Isikkua nerisaalu

Nunarsuarmi niisarnaqatigiit (pissuseqatigiit) marluiupput, tassalu talerukinnerusut takinerusunillu talerullit.  Niisarnallu takisuunik talerullit Atlantikup avannaa tukimut napillugu Kalaallit Nunaatalu imartaani naammattuugassaapput. Niisarnat angisuujupput sakiaminniit naatik ammut sinerlugit qasertortaqartut. Takisuunik taleroqarput silittumillu naparutaqarlutik, tamatuma saniatigut angisoorujussuarmik melonitut isikkulimmik ammalortumik timimikkut atortoqarnertik ilisarnaatigaat. Timip atortua taanna orsutalik niisarnap niaquata siorna´tungaaniippoq taannalu iluaqutigalugu arferit kigutillittulli sumiissusersiortarput. Niisarnat 6-7 meterisut angitigilersinnaapput ammalu 1.300 kg-t (arnavissat) 2.300 kg-t (angutivissat) akornanni oqimaassuseqalersinnaasarlutik. Niisarnat upernalernerani nerisannaaminnik amikunik neriniarlutik Kalaallit Nunaata imartaanut pisarput.

Siammarsimanerat

Niisarnat Atlantikup avannaani tamarmi naammattuugassaapput aammalu niisarnat tamakkerlutik 1 millionit missaanniissagatinneqarput. Imavissuup uumasoraat ilaqutariillu imminnut qanittut ataatsimoortut 10-100-t missaanniittarput. Niisarnat aasakkut Kitaata imartaani tamarmi naammattuugassaasarput, amerlanerpaalli Store Hellefiskebankep kitaaniittarput, tamaani immami itisuumi amikorniartarput. Immap kiassusia Kalaallit Nunaatalu imartaani niisarnaqarnera imminnut attuumassuteqassangatinneqarput.

Kalaallit Nunaanni inissisimanera

Niisarnartarineqartut amerlassusiat ukiumiit ukiumut allanngortarput, kisianni agguaqatigiissillugu ukiumut 150-t pisarineqartarput. Niisarnaq Aarlerinartorsiunngitsutut Rødlistemi inissisimasutut allassimavoq. Aarluarsoqatigiittulli allatut niisarnat ingerlatsinikkut aqutsiffigineqanngillat.

Ilisimatusarneq

Arfernik kisitsinernut niisarnat ilaatinneqartarnerisa saniatigut Kalaallit Nunaata imartaani niisarnat sananeqaataannik annikitsuinnarmik misissuisoqarsimavoq. Savalimmiut imartaani niisarnaqatigiinnik ilisimatusartoqangaatsiarpoq.