Uiluik Kalaallit Nunaata imartaaniittoq taaguuteqarpoq Chlamys islandica. Taanna issittup kujasinnerusortaa siammarsimavoq. Chlamys islandica-t aalisassallugit soqutiginaatillit Norgep Avannaata sineriaa atuarlugu, Svalbardip Jan Mayenillu eqqaanni, Islandip eqqaani, Kalaallit Nunaata eqqaani kiisalu Amerikap Avannaata sineriaa Cape Cod-imiit Newfoundlandimut atuarlugu naammattuugassaapput.

Uiluiit kangerluit anillagiaanni, ikerasanni amitsuni imaluunniit nunap qanittuani ikkannerni ulittarnerup tinittarnerullu sakkortuumik sarfartitaanni 20 meterimiit 60 meterimut itissusilimmi naammattuugassaagajuttarput. Kalaallit Nunaata eqqaani uiluiit alliartortarnerat ataatsimut isigalugu sumiiffinni allani uiluiit alliartortarnerannut naleqqiullugu arriitsuarakasiuvoq.

Soorlu sumiiffinni arlalinni uiluiit qaleruamik takissusiat 65 mm, Kalaallit Nunaanni aalisarnermi minnerpaaffissaatitaasoq, ukiut qulit sinnerlugit angusinnaasarpaat. Uiluik junip naaneraniit septemberip aallartinneranut suffisarpoq. Piffissami tassani alliartornissamut periarfissat pitsaasut oqimaannerutitsisarnerat kiisalu nukiisa kinguaassiuutaasalu qinersiisa pitsaassusiisa qaffasinnerusarnerat pissutigalugu aalisarneq pissarsinarnerpaasarpoq.