Aalisakkat immap ikeraneersut

Aalajangersimasoq pillugu paasisaqarnerorusukkuit qulaaniittut arlaat tuussavat.

Aalisakkat immap ikeraneersut pillugit ICES-ip 2022-mut siunnersuinerata eqikkarneqarnera

Immap ikerani aalisakkat Kalaallit Nunaannut attuumassuteqartut, soorlu: Ammassaat, avaleraasartuut, ammassassuit aammalu saarullernat, pisassiissutigineqartussat annertussusissaat siornalu siunnersuutigisanut naleqqiullugit suut allannguutaanersut ICES-ip innersuussutaasa eqikkarneqarneranni saqqummiunneqarput. Pineqartut pingaarnerit pillugit siunnersuinermut patsisaasut Appendiks 1-imi nassuiarneqarput. Ukiut ingerlaneranni pisat, siunnersuinerit Kalaallit Nunaatalu imartaani pisat nalunaarsugaanerat Appendiks 2-mi takuneqarsinnaapput.

2022-mut sunniuteqartut ukuupput:

• 2021-mi septembarip ingerlanerani Tunumi nipi atorlugu misissuinermi aalisagaqatigiiaat 2019-imiit malinnaavigineqartut  amerlasuujunerat uppernarsarneqarpoq. Amerlanerpaartaat 2022-mi upernalernerani Islandimi suffinissaat naatsorsuutigineqarpoq, tamannalu patsisaalluni 15. oktober 2021-miit 15. april 2022 tikillugu 904.200 tonsit aalisarneqarsinnaasut siunnersuutigineqarpoq. 2022-mi januarimi februarimilu peqassutsimik misissuisoqaqqissaaq, tassanngaanniillu nutaamik  siunnersuinissamut nalileeqqittoqarumaarluni.
• Avaleraasartuut kangimut siaruaakkiartupiloornerisa kingunerisaanik kalaallinit pisarineqartut nunat tamalaat imartaani  Norskehavemiittumi pisarineqarput. 2022-mullu siunnersuinerit 2021-mut naleqqiullutik 7%-imik ikileriaateqarput.
• Ammassassuarnut tunngatillugu 2022-mi siunnersuineq 2021-mut naleqqiullugit 8%-imik ikileriaateqarput. 2016-imi tukersimasut pisarineqarnerpaapput. Ukiunili malittuini tukersimasut ilimagineqarsimasumit ikinnerupput.
• Saarullernat pillugit 2022-mut siunnersuinermi ukiuni kingullerni takkussuussimasut ikinnerunerat pissutaalluni innersuussutaasut 2021-mut naleqqiullutik 19%-imik ikileriarsimapput.

Pisortatigoortumik  siunnersuinerit ICES-ip nittartagaani takuneqarsinnaapput (www.ices.dk).

Nunatsinni aalisagassartanut tunngatillugu ICES-ip siunnersuinerminut atugassai Pinngortitaleriffiup suliaralugillu tunniutarai, paasissutissallu aalisarnermut inuussutissarsiortunit peqassutsimillu misissuinernit katersorneqarsimapput. Uppernarsaatinik amerlanernik pissarsisoqarusuppat  Pinngortitaleriffik itisiliinissaminut piareersimavoq.

Eqikkaaneq tamakkeqqasoq uani aasinnaavat: Aalisakkat immap ikeraneersut pillugit ICES-ip 2022-mut siunnersuinerata eqikkarneqarnera

Siornatigut siunnersuinerit uani takusinnaavatit: