Ilulissat Kangiani natsiit immikkooruteqartut uppernarsi-neqarpoq Saqqummersinneqarfia 20.10.2023
Kangiani natsiit sukumiinerusumik misissuiffigineqarnerisa takutippaat immikkooruteqarluinnartuusut. Misissuinerit ilaatigut ilisimatusartartuunerup Aqqalu Rosing-Asvid’ip Pinngortitalerif-fimmeersup, ilisimatusartartut allat peqatigalugit suliaanni tamanna ersersinneqarpoq.
Kangiata natsii angisoorujussuupput amiilu allalersorneqarnermikkut qalipaatimikkullu allaanerullutik. Piniartut Qeqertarsuup Tunuaneersut ilisarisarpaat Kangiat- nillu taagortarlugit natsiit allat Kitaajaqqanik taasarlugit. Satellit-ikkut misissuinerit paasinarsisippaat natsiit Kangianiiginnartuunerusuusut. Natsiimmi Kangianinngaaneersut 24it nalunaaqutserneqaramik ataasiinnaap Kangia sivi-sunerusumik qimassimasimavaa.
Puisit ilalisaataasa misissuiffigineqarnerisa tupaallannartumik paasinarsisippaat natsiit Kangianeersut ukiut 100 tusindtillit matuma siornatigulli immikkuulersimasut immikkullu timimikkut ilalisaateqa-lersimasut, soorlu allanerusumik ameqalersimallutik angissuseqalersimallutillu avatangiisiminnut immikkuullarissumut tulluarsarsimallutik.
“Naak ikittunnguugaluarlutik allaanerussutertik attatiinnarsinnaasimavaat. Kisitsinerillu 2018imi ingerlanneqartut malillugit Kangiani natsiit 3000it missaannik amerlassuseqarput, Baffinip Kangerliumasartaani sumiiffimmullu tamaanga atasuni natsiit 1,2 millioninik amerlassuseqarnissaat naatsorsuutigineqartoq”, ilisimatusartuuneq Aqqalu Rosing-Asvid oqarpoq.
Natsiit issittoq tamakkerlugu siaruarsimasuupput. Nunanilu sumiiffinni immikkoorluinnartuni natseqatigiiaat assigiinngitsut tallimaapput. Taakkunani marluk tatsini uumasuupput, Finlandimi Ruslandimilu, Botniske’p Kangerliumarngani Okhotskellu imaani aamma natseqatigiiaaqarpoq. Natseqatigiiaalli amerlanerpaartaat siaruarsimanerpaallu tassaapput issittup natsii. Taakkua millioninik arlalinnik amerlassuseqarput issittorlu tamakkerlugu siaruarsimallutik. Natsiit tamakkua siaruarsimaffimminni akulerussimasarput misissuinerillu malillugit timaanni ilalisaataat assigiiaartorujussuuppput.
“Natsiit Kangianeersut natsernik allaneersunut akuliuttaraluarlutik immikkoorutertik attattuartarpaat, taamaattumillu ilaminnik allaanerulluinnartumik puisiussuseqarlutik, puisillu akornganni taamaattut qaqutigoortorujussuupput”, ilisimatusartuuneq Aqqalu Rosing-Asvid naggasiilluni oqarpoq.
Ilisimatuussutsikkut aallaaserisaq tamakkerlugu uani atuarsinnaavat: https://doi.org/10.1111/mec.17163
