Klaus Nygaard ukiuni 40ngortorsiortoq Saqqummersinneqarfia 01.05.2024

Photo: Christian Sølbeck / Pinngortitaleriffik
Josephine Nymand Pinngortitaleriffiup pisortaa Klaus Nygaardimut qujassuteqarluni oqalugiartoq
Klaus Nygaardip ukiuni 40ni sulinermini aqqusaarsimasani oqaluttuarigai
Sulisut pisortarisimasaminnut ataqqinnillutik nalliuttorsiualaartut
Nalliuttorsiornermi sulisut tamarmik peqataapput
Pinngortitaleriffiup pisortaa Josephine Nymand, Klaus Nygaard Pinngortitaleriffimmilu siulersuisuni siulittaasoq Gert Mulvad.

Klaus Nygaard, Pinngortitaleriffimmi pisortaasimasoq maajip aallaqqaataani ”suliffimmi ataatsimi” atorfeqarnermini ukiuni 40ngortorsiorpoq. Suliffeqarfilli piffissap ingerlanerani allanngorarfiusimaqaaq. Ilaatigut suliffiup aqqa pingasoriarluni allanngortinneqarsimagami arlaleriarlunilu nuunneqartarsimalluni.  Nalliuttorsiorneq sisamanngormat sulisuinnarnut malunnartinneqarpoq.

Klaus Nygaard 1982imi ilinniartuulluni ikiortitut atorfinissimavoq taamani naalagaaffiup Aalisarnermut Avatangiisinillu misissuisarfiani, uumasorsiuutullu allagartartaarami 1984imi maajip aallaqqaataani atorfinissimalluni. Nunatta kitaani imermik nukissiutiliortoqarnissaa siunertaralu avatangiisinik misissuisuusimavoq. Sivikitsumilli, nunarput 1985imi EFimiit animmat suliap aningaasalersorneqarnera unitsinneqarsimammat.  Taamaasilluni Klaus Nygaard Jameson Landimi uuliasiornissamut tunngatillugu avatangiisinik misissuillunilu nakkutilliisuulersimavoq. Sulinerali tassani aamma sivikippoq amerikamiut uuliasiorfiata ARCOp uuliasiornertik unitsimmassuk.

Nunatsinniilerneq

Klaus Nygaard Nuummi ”Biologstation”-imi taamaasilluni ilisimatuussutsikkut aqutsisunngorpoq, 1987imilu tamaanga nuulluni. Aqutsisutut sulineq oqissimaqaaq uumasorsiuumut ikiorti sulinngiffeqarmat ullullu affaannaa allaffimmioqartarluni. Ukioq taanna danskit naalagaaffiata aalajangiuppaa nunatsinni aalisakkanik misissuivik aammalu nunatsinni avatangiisinut misissuisoqarfik immikkoortinneqassasut, taamaasilluni Klaus Nygaard aalisakkanut tunngasuniilerpoq.

Klaus Nygaard 1989imi allamik sulisitsisortaarpoq, tassa nunatsinni aalisakkanik misissuiveqarfik Namminersornerullutik Oqartussat akisussaaffigilermassuk, avatangiisinut misissuiveqarfik danskit naalagaaffiata akisussaaffigiinnaraat. Ineriartortoqaleqaarlu, taamani Biologstationimi sulisut amerliallammata, 1992imilu Nunatsinni Naalakkersuisut Aalisarnermut Nakkutilliisoqarfiup Københavnimiit nunatsinnut nuussasoq aalajangiuppaat. Pisortaasorlu Danmarkimiit nunatsinnut nuukkumanngimmat Namminersorlutik Oqartussat nutaamik pisortassarsiortariaqarsimapput. Klaus Nygaard 1993imi tassani pisortanngorpoq suliffeqarfiullu Danmarkimiit nunatsinnut nuunneqarnissaa januaarimi 1993imi suliassarilerlugu. Atorfillit akornganni ataasiinnaq nunatsinnut nuukkumasimammat, ukiut pingasut ingerlanerini suliffeqarfik nuukkiartuaarneqassasoq aalajangiunneqarpoq, taamaasilluni suliat ingerlanneqartut unittuunnginniassammata ukiut pingasut ingerlanerini suliat nuukkiartuaarneqarnissaat isumaqatigiissutaavoq.

Pinngortitaleriffik

Aalisakkanik misissuisarfiup akisussaaffigilerneranut atatillugu pinngortitaleriffimmik pilersitsisoqarnissaa kissaatigineqarsimavoq, taamaasilluini timmissat miluumasut assigisaallu sulissutigineqalerniassammata, tamakkua aalisakkanut misissuiveqarfiup isumagineq ajormagit. Sulisut amerlanerulaalerniassammata ”isornartorsiuteqarsinnaanngornissarlu” anguneqarsinnaaniassammat kattullugit inatsisiliortoqarpoq assigiinngitsuniillu aningaasaliiffigineqarluni Pinngortitaleriffik 1995imi januaarip aallaqqaataaniit pilersinneqarpoq.

Pinngortitaleriffik 1998imi maannakkut inissisimaffimmiliinerpoq, alliartulerlunilu, illu ilassuserneqarmat, atortut nutaat pigineqalerlutik: Sanna’p Adolf Jensen taarserpaa, najugaqarfigigallartagaq ilinniartitsisarfissarlu Pikialaarfik pilersinneqarput, Klaus Nygaardillu suliaasa annerit kingullersaat ilisimatuussutsikkut umiarsuaq Tarajoq pigineqalerluni.

Ikorfartuisuuvoq

Klaus Nygaard 2023imi septembarip aallartinnerata tungaanut Pinngortitaleriffimmi pisortaavoq. Suliaalumi amerlasimaqaat, sanaartortitsinerit ilisimatuussutsikkullu umiarsuit marluk sanaartorneqarneri aqutarisimagamigit. Klaus Nygaard massakkut ”ikorfartuisussatut” atorfeqarpoq aningaasaqarnermut ”aningaasassarsiornernillu” suliaqarluni.

Pinngortitaleriffimmi ilisimatusartartut nunanit assigiinngitsunit 15ineersut tunniusimalluinnarlutik sulisuupput, taakkualumi Klaus Nygaardip nersualaarpai:

-Atorfilippassuit pikkorilluinnartut qarasagissullu piginngikkaluarutsigit taamak ingerlalluartiginavianngikkaluarpugut.