Sermersuaq marloriaammik sukkassuseqarluni aakkiartorpoq Saqqummersinneqarfia 10.08.2008

Ilulissat: Kalaallit Nunaata sermii iigartartut ukiut marlussuit matuma siornanut sanilliullugit marloriaammik sukkassusilimmik aakkiartorput. Tunup ilaani aakkiartorneq sisamariaammik sukkassuseqarpoq tamannalu ilisimatuut isumakuluutigaat.

Aakkiartorneq eqqorluinnartumik radari, laseri, satelittit GPS-ilu atorlugit uuttortarsinnaavaat nassuiarsinnaanaguli sooq klimap allaanngoriartornera taama sukkatigilernersoq.

“Ajunngittaqaaq pisut paasisinnaagaanni. Ilisimalluinnanngilarpulli sooq aakkiartorneq taama sukkatigilernersoq,” professor Søren Rysgaard, Nuummi Pinngortitaleriffimmi sulisoq oqarpoq.

Sermip silaannaap kissarnerulersimanera malugaa. Aakkiartornerulli sukkatsikkiartuinnarnera pissuteqarsimagunarpoq immap Kalaallit Nunaannik avatangiisup kissarnerulernera, tamatumalu sermit iigartartut sunnersimassavai, professor Rysgaard isumaqarpoq.

Ilisimatuut amerikamiut silaannarsuarmik misissuiffianni NASA-mi sulisut uppernarsarnikuuaat aasaanerani sermersuup qaava taserujussuaqalersartoq, imerlu taanna samungarsuaq sermersuaq pitarlugu naqqanut pisarpoq. Imerlu tamanna pujassaatigalugu sermersuup ilarsua immap tungaanut ingerlaalersarluni iigarluni iluliarpassuaqalersitsisarluni.

“Ukiorpassuarni kingullerni sammivik ataasiinnaavoq: Sermersuaq sukkanerujartuinnartumik aakkiartorpoq,” taama oqarpoq Abbas Khan DTU Space-imi sulisoq. Taanna qallunaat ilisimatuut qaammatini makkunani Kalaallit Nunaanni sermit iigartartut ingerlaarnerisa uuttortarneqarneranni sulisut ilagaat.

“Sermerli massakkut Tunup ilaani siornatigornit sisamariaammik sukkassuseqarluni aakkiartorpoq,” Abbas Khan oqarpoq. Tamannalu Kalaallit Nunaanni sermip nunarsuarmi imarsuit qaffakkiartornerannut peqataaneranut takussutissaavoq. Ilisimatuut naatsorsorsimavaat ukioq manna Kalaallit Nunaata sermeq 220 kubik-kilometeritut annertutigisoq immamut avalatsissimassagaa.