Sisimiut eqqaat saattuaqarnerulerpoq Saqqummersinneqarfia 12.11.2008

Sisimiut eqqaata saattuaqarnerujartornera ukiut qassiit ingerlaneranni pisat ikiliartortinneqarneratigut anguneqarsinnaasimavoq. Tamatumalu saniatigut Holsteinsborg Dyb ukiuni pingasuni matoqqatinneqarsimavoq. Iliuuserineqartutigut saattuat amerliartorteqqinneqalersimapput taamalu pisarineqartartut amerliartulersimallutik, saattuaqqallu aalisarneqarsinnaasinnaalersussat aamma amerliartulersimallutik. Taamaammat Pinngortortitaleriffiup siunnersuutigaa Sisimiut eqqaanni 2009-mi pisat 800 tonsinit amerlanerussanngitsut. 2008-mut siunnersuutit 350 tonsiusimapput.

Kitaata sinnerani saattuat suli ikittuinnaapput. 2001-imi aalisarnerup qaffasinnerpaaffianit pisat 15.000 tonsiusimariarlutik 2007-imi katillutik 2.200 tonsiupput. Pinngortitaleriffimmit siusinnerusukkut pisassiissutit qaffasittarsimanerat aalisarnerujussuarmik kinguneqartarsimasoq saattuat ikileriarsimanerannut takuneqartumut pissutaasorineqarpoq. Sisimiut eqqaanni misilittakkat pitsaasut aqutsivinnut allanut atuutsinneqalernissaat Pinngortitaleriffimmit kaammattuutigineqarpoq.

Qeqertarsuup Tunuani pisat ukiuni qassiini ikiliartorsimapput saattuallu amerliartornerannik malunnartoqarani. Tamannalu aarlerinartoqartinneqarpoq. Taamaammat Qeqertarsuup Tunuani 2009-mi pisat 600 tonsinit amerlanerussanngitsut Pinngortitaleriffimmit siunnersuutigineqarpoq. Siunnersuutigineqartullu 2007-imi pisat amerlaqatigaat. 2008-mut siunnersuutit 1.500 tonsiusimapput.

Paasissutissanik amigaateqarneq pissutigalugu Paamiunut siunnersuutit allanngortinneqanngillat, Maniitsullu eqqaa pillugu 2009-mut siunnersuuteqartoqanngilaq.

Pinngortitaleriffiuttaaq kaammattuutigaa sumiiffinni aqutsiviusuni tamani piffissaq saattuarniarfiusoq martsip naaneraniit juulip qeqqanut ingerlasassasoq. Piffissamik aalajangersimasumik aalisarfissaqartitsisalernikkut nutaanik saattuaaqqanik aalisarneqarsinnaalersussaqalernissaa qularnaarneqassaaq, ilaatigullu aamma eqqaaginnartarneq toqusoortarnerlu annikillineqassaaq taamalu pisuussutsit atorluarneqarnerulissallutik.

Apeqqutissaqaruit saaffigiuk saattuanut biologi AnnDorte Burmeister oqarasuaat 36 12 00 im. e-mail: anbu@natur.gl

Ilanngussat takukkit pdf (1083 kb)

Qeqertarsuup Tunuani sinerissap qanittuani:. 2009-mi pisassat 600 tonsit sinnissanngikkaat siunnersuutigineqarpoq, (Qeqertarsuup Tunuata kujasinnerusuani 200 tonsit avannarpasinnerusuanilu 200 tonsit kiisalu Sullorsuarmi (Vaigat) 200 tonsit. 2008-mut siunnersuut 1.500 tonsiuvoq.

Qeqertarsuup Tunuani 2007-imi pisat 574 tonsiupput (2001-imi pisanit 80%-inik ikinnerullutik). Pisat ikiligaluarmata saattuat amerleriarsimanginnerat aarlerinartoqartinneqarpoq. Siunnersuutigineqartut 600 tonsiusut 2007-imi pisat amerlaqatigaat, Sisimiullu eqqaani aalisarnerup annikillineqarneratigut ukiualuit ingerlaneranni saattuat amerlatsikkiartoqqilernerannik misilittakkat aallaavigalugit siunnersuutigineqarluni.

Sisimiuni sinerissap qanittuani: 2009-mi siunnersuutigineqarput 500 tonsit.(qangali aalisarfiusartuni 300 tonsit, Nassuttuumi Sisimiullu Isortuani 200 tonsit. 2008-mut siunnersuut 350 tonsiusimavoq. Biologit misissuisarneri aammalu aalisarnermit paasisat naapertorlugit saattuat amerliartulersimapput.

Sisimiut avataanni: Katillugit 300 tonsit pisassiissutigalugit saattuarniarnermik ammaasseqqittoqarnissaa Pinngortitaleriffimmit kaammattuutigineqarpoq. Saattuat mianersuunneqarnissaat allanngoriartornerisalu malinnaaffigeqqissaarneqarnissaat kaammattuutigineqarpoq. Biologit misissuisarneri aammalu aalisarnermit paasisat naapertorlugit saattuat amerliartulersimapput. 2008-mi saattuarniartoqannginnissaa siunnersuutigineqarsimavoq.

Nuuk-Paamiut avataani: Aalisakkanik misissuummi R/V Sannami teknikkikkut ajornartorsiutit pissutigalugit 2007-imi 2008-milu biologit Nuup Paamiullu akornata avataani misissuisinnaasimanngillat. Taamaammat Pin-ngortitaleriffiup 2008-mi siunnersuutigisimasaminik 1.600 tonsiusunik allanngortitsinissaminut pissutissaqanngilaq.

Saattuarniarneq pillugu siunnersuineq Pinngortitaleriffimmit suliaavoq, siunnersuinerlu Canadami Quebecimi New Founlandimilu Aalisarnermut Pisortaqarfiup saattuanut biologii peqatigalugit pitsaassusii qularnaarneqarsimapput naliliivigineqarsimallutillu.

Tabel 1. Aqutsivinni ataasiakkaani 2009-mi saattuartassatut siunnersuutit