Tuttunik misissuineq Akia-ni aammalu Maniitsumi upernaakkut 2008 Saqqummersinneqarfia 28.04.2008

Ilisimatuut, piniarnermik nakkutilliisut, ilisimatusartut og ilisimatuullu ikiortai annertuumik tuttoqarneq 2008 upernaani misissussavaat.

Akia – Maniitsumilu tuttut utoqqaassutsimikkut suiassutsimikkullu qanoq katitigaanerat Pinngortitaleriffiup inersimasunik piaqqanillu kisitsinikkut misissuiffigissavaa 4.-17. Marts. Tuttut timimikkut atugaat aamma misissuiffigineqassapput, tuttoqatigiit angissusiannut, tunnoqassusiannut, nappaateqarnerannut, miluguussimasoqarnerannut timimikkullu mingutitsinermik eqqugaanerannut paasissutissanik tunngaviusussanik katersuisoqassalluni. Tamanna pissaaq 25. Marts – 17. April tungaanut. Misissuineq tuttoqatigiit qanoq innerannut paasissutissanik pingaarutilinnik pissarsiffiussaaq. Misissuineq taanna nunat arlallit klimap allanngornerani tuttut atugaannik annertuumik misissuinerata CARMA-p ilagissavaa. Akia – Maniitsumi tuttoqatigiit nunarsuarmi tuttoqatigiit tallimaasut akornanni qinigaasimapput taamatut peqqissaartumik misissuivigineqartussatut, misissuinerlu avataaniit IPY-miit (International Polar Year) aningaasaliiffigineqartussaalluni.

Pinngortitaleriffiuttaaq tuttut kulavaat 40-t Akia – Maniitsumiittut qaammataasakkoortumik aallakaatitsissutilimmik qungasequtsorniarlugit pilersaarutigaa. Aallakaatitsissutit atorlugit Alcoa-p aluminiuliorfiliornissaanut erngup nukinganik nukissiorfiliornerata tuttunut sunniutigisinnaasai paasiniarneqassapput. Aallakaatitsissunik ivertitsinissaq helikopterikkut ingerlanneqassaaq 24. April – 17. Maj akornanni.

Aammattaaq norriffiusartut nalunaarsorniarneqarput, nukissiorfiliugassamut atatillugu sarfap sakkortuup aqqutissaanik, norriffiusartutut pingaarutilittut ilimagineqartut aqqusaarlugit napparutsersuisoqartussaammat.

Misissuinerit Pinngortitaleriffimmi biologinit Christine Cuyler aamma Lars Maltha Rasmusen, piniarnermillu nakkutilliisumit Hans Mølgaard, Sisimiut, siulersorneqassapput. Piniarnermik nakkutilliisut ikiortaat kalaallillu biologimut atuartut ilisimatuutut misissueriaatsimik ilinniarlutik peqataassapput, ilisimatuunittaaq Alaskamiit, Canadamiit, Finalandimiit biologassistentinillu Pinngortitaleriffimmeersunik peqataasoqassaaq. Naatsorsuutigineqarportaaq piniartut Nuummiut siusinnerusukkut kisitsisarnernik misilittagaqartut alaatsinaattutut ilaatinneqarumaartut.