Aavernik siunnersuisoqarniartoq Saqqummersinneqarfia 03.12.2009

NAMMCO (The North Atlantic Marine Mammal Commission) ilisimatuussutsikkut suleqatigiissitaat Kalaallit Nunaannit, Danmarkimit, USAmit, Canadamit Norgemillu ulluni 23.-26. november Københavnimi Namminersorlutik Oqartussat allaffeqarfianni ataatsimiissimapput Kalaallit Nunaanni Canadami Svalbardimilu aaveqassutsip qanoq innera eqqartorniarlugu.

Suleqatigiissitat ilaatigut kisitsinernit inernerisat, aaveqatigiit siaruarsimanerat, kinguaariinni pissutsit kingornunneqartartut, satellit atorlugu malinnaasarnerit, piniarnermik paasisat aammalu pinngortitami ataqatigiinneq eqqartuiffigaat, aaveqatigiit qanoq innersut paasisaqarfiginiarlugit.
Suleqatigiit aamma isumaqatigiipput Kalaallit Nunaanni aaveqatigiiaat pingasuusut pillugit piujuaannartussamik piniarneqartarnissaannik innersuussiniarlutik. Ataatsimiinnermit nalunaarusiaq kingorna NAMMCO’p ilisimatuussutsikkut ataatsimiititaliaanut saqqummiunneqassaaq, taavalu kingorna Kalaallit Nunaanni aarrit piujuaannartumik piniarneqarnissaat pillugu NAMMCO siunnersuiumaaarpoq. Ataatsimiinnermit imaqarniliaq inernerillu NAMMCO´mit akuerineqareerpata aatsaat saqqummiunneqassapput.
NAMMCOmi suleqatigiissitap 2005-mi kingullermik ataatsimiinnerani ilisimasat annikippallaat pigineqarneri tunngavigalugit siunnersuisoqanngilaq. Aarrit pillugit siunnersuineq atuuttoq tassaavoq 2006 aamma 2007-mi siunnersuineq Pinngortitaleriffimmeersoq.
Tamatuma kingorna aarrit amerlassusaannut ilisimasagut aammalu aaveqatigiit assigiinngitsut immikkoortiternerinut ilisimasat annertuumik pigineqalersimapput. Ilisimasat nutaat piniarnermut naatsorsukkat tapertaralugit piujuaannartussamik piniarsinnaanermut annertussusiliinermut atorneqarsimapput. Misissukkat nutaat piviusunngorsinnaasimapput Danmarkimi Miljøstyrelsenip annertuumik aningaasaliineratigut.

Pinngortitaleriffimmit suleqatit sisamat NAMMCO´p ataatsimiitsitaliaanut peqataapput, siulittaasuuvorlu misissuisuuneq Erik W. Born.

Attavissaq Erik W. Born, misissuisuuneq, Pinngortitaleriffik
Telefon 36 12 00 e-mail

Fernando Ugarte, immikk. pisortaq, Pinngortitaleriffik
Telefon 36 12 00 e-mail