Piniarfinnik nakkutilliisut biologillu timmissanik kisitsinermi ikioqatigiipput Saqqummersinneqarfia 15.10.2009
Pinngortitaleriffimmit biologit 2009-mi juunip ulluisa 17-ianniit 25-ata tungaanut Nuummiit Maniitsup avannaa´tungaanut Kangerlussutsiamut timmissat erniorfiini kisitsisimapput. Piniarfinnik nakkutilliisut aamma Aalisarnermut, Piniarnermut Nunalerinermullu Naalakkersuisoqarfik suleqatigalugit kisitsisoqarpoq.
Nuup Kangerluata Niaqunngunallu akornat qeqertaqarfippassuit annertoorujussuupput qeqertallu anginerit mikinerillu uuntritillit arlalippassuupput. Nuup Atammiullu akornanni aqqutissat nalunaarsorneqarsimasut saniatigut ; sumiiffik angallavigiuminaatsorujussuuvoq. Piniarfinnilli nakkutilliisup Jakob Heilmannip taassumalu ikiortaata ; Morten Lyberthip, APNN, sumiiffik ilisimalluarpaat, ilisimasaallu sumiiffimmi aaqqissuusaasumik biologinit Pinngortitaleriffimmeersunit aalajangiisuusumik iluatsittumillu nalunaarsuisoqaqqaarnissamut pingaaruteqartorujussuupput. Piniarfinnik nakkutilliisut angallataat “anaanaasutut” atorneqarpoq, tassanngaanniillu gummibåd iluaqutigalugu qeqertanut toqqakkanut timmissanik erniortunik kisitsiartortoqarsinnaavoq. Pissutsit ajornakusoortut pissutigalugit qeqertarpassuarni timmissat erniortut manna tikillugu aaqqissuussaasumik kisinneqarsimanngillat aammalu sumiiffimmit paasissutissat nutaannginnerusut annikitsullu kisimik pigineqarput. Miteqatigiit erniortut manna tikillugu ilisimaneqarsimanngitsut arlallit saniatigut isunngat, nerlerit, allerit, appat naajaqatigiillu arlallit erniortut nalunaarsorneqarput. Ukiap ingerlanerani angusat pillugit, tamakku suliarineqareerpata, nalunaarusiaq saqqummersinneqarumaarpoq.
Akiani kisitsinermi siunertarineqartoq tassaavoq timmissat imarmiut siammarsimanerannik timmiaqatigiillu amerlassusiannik tunngaviusumik ilisimasaqalernissaq. Sumiiffimmi miteqatigiit arlallit erniorput, mannali tikillugu meqqit sumiifimmi erniortut qanoq amerlatiginersut ataatsimoortumik takuneqarsinnaasimanngillat. Upernaakkut miterniartarnerup annertuumik sivikillineqarnerata kingorna Ilulissat, Uummannap Upernaviullu eqqaanni kisitsinerni meqqit erniortartut 2001-imiit amerlisimasut paasineqarpoq. Taamaattumik sumiiffinni naleqquttuni ukiumoortumik nakkutilliisinnaaneq naleqquttuunersup misissorneqarnissaa aamma siunertarineqarpoq, Kitaata Kujataani sikuneq ajortuni meqqit amerliartornerat malinnaaffiginiarlugu. Ukioq manna asimi sulinerit takutippaat sumiiffinni meqqit siunissami amerliartornerisa malinnaaffiginissaannut periarfissaqarluartoq.
Qeqertani timmissanik erniortunik kisitsineq pilersaarutigineqartumit sivikinneruvoq, tamannalu piniarfinnik nakkutilliisut sumiiffimmik ilisimasaqarnerannik, angallatip sukkasuuneranik silagissiornermillu pissuteqarpoq. Taamaattumik Kangerlussuatsiami, Sermilinnguami, Isortumilu Kujallermi Maniitsup eqqaaniittumi innarsuarni timmiaqarfiusuni kisitsinissaq aalajangiunneqarpoq, tamanna 2010-mut kinguartinneqarsimagaluarpoq. Innarpassuarni timmissat erniorfiini ilaatigut toqqaannartumik kisitsisoqarpoq, ilaatigut assiliisarluni nalunaarsuisoqarluni, tamatumani assilisatigut timmissat kingusinnerusukkut kisinneqarsinnaallutik. Timmiaqatigiikkuutaat tamakku Pinngortitaleriffimmiunit 2003-mi aaqqissuussamik kisinneqarput, taamaattumillu timmissat pillugit nalunaarummi ilaatigut appanniartarnissat sivikillineqarneratigut timmissat erniortut amerlassusiat eqqoriakannerneqarsinnaalerpoq.
Pisuussutinik uumassusilinnik atorluaanissaq pillugu Pinngortitalerifimmiut Namminersorlutik Oqartussanut siunnersuinissaq pingaarnertut suliassaraat, tassunga ilanngullugit timmissat imarmiut tamannalu ilutigalugu piniarfinnik nakkutilliisut ilaatigut peqataanissaq Pinngortitaleriffimmiullu taamatut suliaqarneranni ikiuunnissaq suliassaraat. Nungusaataanngitsumik atuinissaq qulakkeerniarlugu timmissat erniortut amerliartornerminni killiffiisa sukumiisumik ilisimasaqarfiginissaat aalajangiisuuvoq. Taamaattumik Kalaallit Nunaanni timmiaqatigiit imarmiut erniorfii ingerlaavartumik nunap assiliorneqartassapput nakkutigineqarlutillu.
2009-mi juunip ulluisa 15-anniit 2009-mi juunip ulluisa 19-annut Kitsissuniit Niaqunngunamut kisitsisoqarpoq. 2009-mi juunip ulluisa 22-anniit 2009-mi juunip ulluisa 25-annut Kangerlussuatsiami, Sermilinnguami Isortumilu Kujallermi kisitsisoqarpoq.
Amerlanerusunik paasisutissanik pissarsiniaraanni uunga attaveqartoqassaaq:
Ilisimatusartoq, Lars Maltha Rasmussen, Pinngortitaleriffik,
Oqarasuaat.: 36 12 96
e-mail: lara@natur.gl
Appat innap killingani timmiaqarfimmi Sermilimmi. Asseq: Lars Maltha Rasmussen.
Piniarfinnik nakkutilliisoq Jakob Heilmann angallammik Tuukkarmiittoq. Asseq: Lars Maltha Rasmussen.
