*Required
*Required
*Required
*Required
*Required
*Required
*Required
*Required
Send
Thank you for your application!
 

Klima pillugu ilisimatusarfittaaq Nuummi atoqqaartinneqartoq

Kalaallit Nunaat klima pillugu ilisimatusarfittaarpoq, Klimaforskningscenter. Klimap allanngornerinik ilaatigullu issittumi pinngortitamut inuiaqatigiinnullu sunniutaannik ilisimatusarfiusussaavoq.

Kalaallit Nunaanni klimaforskningscenteri Videnskabsministeriamiit 35 mio. kr. aningaasaliiffigineqartoq tallimanngornermi 1. maj Nuummi atoqqaartinneqarpoq. Professor marinbiolog Søren Rysgaard centerimi nutaami Klimauniversitetimi pisortanngorpoq.

Kalaallit Nunaanni ilisimatusarneq taannarpiaq tapersersussallugu pingaartuuvoq, tassami inuiaqatigiit kalaallit allanngornernit tamakkuninnga toqqaannartumik sunnerneqartussaammata. Qallunaat kalaallillu klimamik ilisimatusarnerat aamma siunissami malunnarnerusumik pingaaruteqarnerusumillu sunniuteqalersussaavoq, videnskabsminister Helge Sander oqarpoq.

Naalakkersuisunut ilaasortaq Tommy Marø suleqatigalugu videnskabsministeri Danmarkip Kalaallit Nunaatalu klimap allanngornerisa issittumi pinngortitamut inuiaqatigiinnullu tamaaniittunut sunniutaasa ilisimatusaatigineqarnerata ingerlaannarnissaannut globaliseringspuljemiit aningaasaliinikkut periarfissiisimapput.

Kalaallit Nunaanni ilisimatusarnermut naalakkersuisup Tommy Marø-p Nuummi klimacenterertaarneq nuannaarutigisorujussuuvaa:

Klimaforskningscenterertaap maani kalaallit nunatsinni inissinneqarnera nuannaarutigisorujussuuarput. Neriussaagut unammiuagassat naapitassariumaakkatta ilarpassuinut aaqqiissutissanik nassaartorfiujumaartoq, Tommy Marø oqarpoq. Klimaforskningscenterertaap aningaasalersugaaneranut Kalaallit Nunaat aamma peqataavoq. Ilaatigut klimaforskningscenterertaap Pinngortitaleriffimmi allaffeqartinneqarneratigut, Tommy Marø oqarpoq.

Centerip pisortaa professor Søren Rysgaard ukiuni kingullerni sisamani Pinngortitaleriffimmi Nuummiittumi professoriusimavoq tassanilu ilisimatuutut suleqatigiinnermik ingerlalluartumik pilersitsereersimalluni. Pinngortitaleriffimmi allaffeqaannassaaq. Centerimi pisortap saniatigut inuiaqatigiinnut tunngatillugu ilisimatusaatinut professori Ilisimatusarfimmut, Kalaallit Nunaanni Universitetimut atatillugu atorfinitsinneqartussaavoq, taamaalereerpallu naatsorsuutigineqarpoq ilisimatusarnikkut suliat nutaat tallimat-arfineq pingasut aallartinneqarumaartut.

Kalaallit Nunaanni Klimaforskningscenterip / Greenland Climate Research Center pingaartumik klimap allanngornerisa sunniutai aammalu tamakkua qanoq iliorluni inuaqatigiinnit naleqqussarfigineqarsinnaaneri sammisussaavai. Issittumimi klimap allanngornerisa kinguneri takussaalereersimapput ilaatigut immap sikuisannerulerneratigut sermersuullu aakkiartorneratigut.

Paasissutissat allat sukumiinerusut pissarsiarerusukkaanni saaffissat:
Professor Søren Rysgaard, Pinngortitaleriffik, tlf. +299 36 12 00
E-mail rysgaard @ natur . gl

Videnskabsminister Helge Sander saaffiginiaraanni saaffissaq informationschef Allan Boldt, tlf. +45 3392 9739, abo @ vtu . dk

Kalaallit Nunaanni ilisimatusarnermut naalakkersuisoq Tommy Marø attavigineqarsinnaavoq tlf. +299 34 50 00