8.b-it Kangillinguit Atuarfianneersut ilisimatusartunik angalaqateqarnissaq ajugaassutigaat Saqqummersinneqarfia 27.10.2010
8.b-it Kangillinguit Atuarfianeersut tallimanngormat Kangerluarsunngualiaqataallutik aamma Pinngortitaleriffimmi aamma Silap Pissusianik Ilisimatusarfimmi ilisimatusartut peqatigalugit laboratoriami suleqataapput. Taamatut iliornerit Inerisaavimmit najukkami silap pillugu unammisitsisoqarnerani ajugaasutaapput, 8.b-llu innaallagissamik sipaarniuteqarnissamik paasititsiniaalluni pissanganartumik sunniuteqarluartumillu unammeqataanerminni ajugaapput. Paasititsiniaaneq qaammatip ataatsip ingerlanerinnaani atuarfimmi innaallagissamik 20.700 kWh-nik sipaarutaavoq, sipaarutaasullu 33.000 koruunit missaanniipput.
Angusat tupinnaannartumik kusanartut taamaattumillu Pinngortitaleriffimmi aamma Silap Pissusianik Ilisimatusarfimmi sulisut tamarmik 8. b pilluaqqorujussuarpaat takoqqissallugillu. Atuaqatissi ilaat siunissami ilisimatusartunngorumaartut qularutiginngilarput.
Ajugaasunut tunissutissat tunniunneqarnissaannut aqaguttoq tallimanngornermi oktobarip ulluisa 22-ani nal. 8.30 atuartut angallatinut Marie Martek-imut aamma Stern-imut ikipput. Atuartut sivikitsumik angalareerlutik aqqutaanilu pinngortitaq, pinngortitami ataqatigiinnerit silalu pillugit ilisimatusartunik eqqartueqateqareerlutik Kangerluarsunnguami Pinngortitaleriffimmiut qaammatit tamaasa immamit misiligutissanik tigusisarfiannut apuupput. Tassani atuartut ilisimatusartut qanoq iliorlutik immami nerisareqatigiinni uumassusillit mikinerpaat paasisaqarfiginiarlugit taratsumik aamma uumasuaqqanik tappiorannartunik misissugassanik katersisut isiginnaarpaat.
Atuartut Pinngortitaleriffimmiut suliaq tikillugu misissuiffianni nutaami Kangerluarsunnguup qinnguaniittumi sivikitsumik pulaareermata Nuummut uternerminni aqqutaata qeqqani unillutik Pinngortitaleriffimmi laboratoriami misissugassanik aalisarput. Atuartut pisatik qaqereerlugit Pinngortitaleriffimmut utinnginnerinni sandwichinik ulloqeqqasiorput. Laboratoriami aalisakkat assigiinngitsut uullillugit ilisimatuussutsikkut misissorneqartussaapput aamma aalisakkat qanoq uumasarnersut qanorlu sananeqaateqarnersut pillugit atuartut oqaloqatigineqartussaapput. Laboratoriami sulinermi ullaap tungaani Kangerluarsunnguami uumasuaqqat tappiorannartut pisarineqartut sukumiinerusumik aamma misissorneqarput. Uumasuaqqammi tappiorannartut soqutiginartorujussuupput, tassami immami nerisareqatigiinni pingaarutilerujussuarmik inissisimagamik. Atuartut tiguartisimaqalutik suliassatik aallartippaat suliatigullu pitsaanerpaanit ilinniartinneqarlutik – sulineq naammattumik atuagarsornertalik.
Pinngortitaleriffiup aamma Silap Pissusianik Ilisimatusarfiup aningaasaleeqataanerisa saniatigut Kommuneqarfik Sermersooq, Brugsen Nuuk, Nuuk Transport, Nukissiorfiit aamma ABC- Boat Charter pisunut aningaasaleeqataapput angalanerlu tamatumalu kingorna Pinngortitaleriffimmi laboratoriami atuartut suleqataanerannut iluatsilluartumut atuartunullu paasisaqarnarluartumut peqataapput.
8b Kangerluarsunnguami suliat tikillugit sullivimmiittut. Assiliisoq: Lars Poort
Ullormut pisat oqimaalutarneqarput, uuttortarneqarlutik uullillugillu misissugassanngortinneqarlutik. 8.b-mi atuartut ilaat arlallit ilisimatusartunngorumaarunnarsipput. Assiliisoq: Lars Port
