"> Danmarkimi silap pissusaa pillugu aamma nukissiuuteqarnermut ministeri Tunup Avannaani ilisimatusarfimmut Zackenbergimut tikeraartoq - Greenland Institute of Natural Resources
 

*Required
*Required
*Required
*Required
*Required
*Required
*Required
*Required
Send
Thank you for your application!
 

Danmarkimi silap pissusaa pillugu aamma nukissiuuteqarnermut ministeri Tunup Avannaani ilisimatusarfimmut Zackenbergimut tikeraartoq Saqqummersinneqarfia 29.11.2010

Silap pissusianik ilisimatusarfimmiut Sila pillugu nukissiuuteqarnermullu ministerimik Lykke Friisimik Daneborgimi Zackenbergimilu takornariartitsiniarlutik peqataapput. Tamanna ilutigalugu ministeri Zackenbergip aamma Nuup eqqaanni immami misissugassanik tigooqqaaviit (MarinBasis programmerne) pillugit aamma nunatsinni nunattalu eqqaani Silap pissusianik Ilisimatusarfimmiut ilisimatusarnerat ilisimatusarnissamillu pilersaarutaat pillugit ilisimatinneqarpoq.

Tikinneqartoq siulleq tassaavoq Daneborg, immami ilisimatusarnerit tigooqqaaviillu pillugit atortut tassaniitinneqarput. Silap pissusianik Ilisimatusarfimmi aamma Aarhusimi Universitetetimi Danmarks Miljøundersøgelserimi ilisimatusartut ukioq manna suliat tikillugit misissuinertik naammasseqqammerpaat ukioq mannalu immikkut ittumik sikorsuakinnerunera pissutigalugu suliat ajornannginnerusumik suliarineqarsinnaasimapput.

Danborgimi ilisimatusarnermut atortorissaarutit nutaat takusartinneqarput. Ilisimatusarnermut atortorissaarutit tassaapput laboratoria, umiatsiaasivik illulu nutaaq ilisimatusartut najugaqarfigisinnaasaat 154 m2-itut angitigisoq. Ilisimatusartut Young Sund Fjordenimi Tunullu Avannaarsuata imartaani sulisillutik maannakkut ilorrisimaarnarnerullutik najugaqarsinnaalerput. Illut umiarsuaararlu ilisimatusarnermut atorneqartartoq Aage V. Jensenip Aningaasaateqarfianit aningaasalerneqarsimapput. Septembarimi illuliorneq naammassisagatinneqarpoq ukiorlu manna atorneqalertussaalluni, tassani ilisimatusartut nunatsinneersut Canadameersullu suleqatigiillutik Young Sund Fjordenip avataani immap sikuanik misissuissapput.

Daneborgimeereernerup kingorna, tassani ilaatigut nanoq aarrillu marlussuit takuneqarput, angalaqatigiit qulimiguulimmik Zackenbergip qooruata timaani sermimut iigartartumukarput. Tassani ministerip uuttortaavik GlacioBasis programmet-imeersoq takuaa uuttortaatillu taassuma nammineq ingerlasumik sila sermillu iigartartup ingerlanera aakkiartorneralu uuttortartarpai. Uuttortaavik nunatsinni uuttortaaviit imminnut atassuteqartut ilagaat.

Unnuk taanna Zackenbergip eqqaani stationeqarfimmik takuniaatitsisoqarpoq. Zackenbergimi arlalinnik najugaqarfigineqarsinnaasunik illoqarpoq, laboratoriaqarpoq, innaallagissiorfeqarpoq il.il.

Aqagukkut stationeqarfiup katersortarfiani oqalugiartoqareermat Zackenbergimi misissuiffinnik takuniaatitsisoqarpoq, tamakkunanilu uuttortaaviit, KlimaBasis, BioBasis aamma GeoBasis programmerne, sulisunit stationeqarfimmilu ilinniartunit takutinneqarput. Naggataatigut angalaqatigiit Danmarkimut aallannginnerminni Zackenbergip eqqaani illuaraq piniariartarfiusimasoq takuniarsinnaasimavaat.

Assiliisoq: Søren Rysgaard

Illu ilisimatusarfissaq Daneborgimiittoq ukiap ingerlanerani naammassineqassaaq taannalu Aage V. Jensenip Aningaasaateqarfianit aningaasaligaavoq. Assiliisoq: Søren Rysgaard

Zackenberg Namminersorlutik Oqartussanit pigineqarpoq Danmarks Miljøundersøgelserinillu ingerlanneqarluni. Zackenbergimi sulineq Zackenberg Ecological Research Operationsinimit (ZERO) pisortat suliffeqarfiutaat tullinnguuttut makku suleqatigalugit ataqatigiissaarneqarpoq:

·         Aarhus Universitetimi Danmarks Miljøundersøgelser

·         Pinngortitaleriffik aamma Silap pissusianik Ilisimatusarfik

·         Københavns Universitet

·         Asiaq, Kalaallit Nunaanni misissueqqaarnerit

·         De Nationale Geologiske Undersøgelser for Danmark og Grønland (GEUS)

Zackenbergimi suliat ukunannga aningaasat atorlugit ingerlanneqarput:

·         Nukissiuuteqarnermut aqutsisoqarfik

·         Ilisimatusarnermut ministeriaqarfik

·         Namminersorlutik Oqartussat

·         Aage V. Jensenip Aningaasaateqarfii (Aage V. Jensens Fonde)

Verified by ExactMetrics