Nuup Kangerluani uumasuaqqat planktonit, avataanit imarmiittunit allaanerusut Saqqummersinneqarfia 10.03.2010

Silap pissusianik nakkutiginniffimmit MarinBasis Nuuk paasisat kingulliit saqqummersinneqartut takutippaat Nuup Kangerluani pinngortitami ataqatigiinnerit (økosytem), Nuullu avataani immami taamaaqatai assigiinngilluinartuusut

Silap pissusianik nakkutiginniffiup MarinBasis Nuuk, Silap Pissusianik Ilisimatusarfiup ataaniittup, ukiut tallimat kingulliit ingerlanerini Nuup Kangerluani pinngortitami uumassuseqartuni pissutsit misissugarisimavai.

Pinngortitami ataqatigiinnerit Kitaata sarfaanit avannaanit ingerlaartumit aammalu Sermersuarmit aattumit imermit tarajoqanngitsumik annertuumik sunnigaasarput.

Nuup avataani imarmi
Nuup Kangerluani Nuullu avataani imarmi pinngortitami ataqatigiinnerni assigiinngissutaasoq annerpaaq, tassaavoq uumasuaqqat planktonit katitigaanerat amerlassusaallu. Nuup avataani imarmi immami uumasuaqqat Calanus finmarchicus amerlanerpaapput. Taanna Atlantikumi artiuvoq, Kitaata sarfaanit amerlasoorsuutillugit sineriaap avataanut ingerlaartinneqartartut.

Nuup Kangerlua
“Nuup Kangerluani naatsorsuutigisimagaluarparputtaaq Calanus nassaarissallugu, tupaallannartumilli artit allarluinnaat nassaassaanerupput, ikinnerullutilli. Kangerlummi uumasuaraq Metridia longa nassaassaavoq, ilisarnaqutigaalu ingerlagaangami tungujortumik qalipaateqarluni qaamasarami, aamma uumasuaraq nalinginnaavallaanngitsoq Microsetella norvegicar. Taassuma imarmi sananeqaatit minnerpaat (partikelit) ”imarmi aput” nerisarisaraa”, oqaluttuarpoq imarmik biolog Kristine Engel Arendt.

Uumasuaqqat plankton immami inuussutissat uiguleriiaani pingaaruteqarluinnarput, uumasuaqqat naasuussuteqartunit planktoninit uumasunut annernut inuussutitut nukissaq ingerlateqqittaramikku. Uumassuaqqat planktonit katitigaanerat amerlassusaallu taamaattumik pingaaruteqarluinnarput, tassami artinut aalisakkanut, timmissanut arfernullu inuussutissarsiutaasunut nerisaasaramik. Immap sarfaani allanngortoqassagaluarpat, aammalu silap pissusiata allanngornerata kinguneratut Sermersuarmit imerup kuuttup annertusinerata, Nuup Kangerluani avataanilu imarmi uumasuaqqat planktonit katitigaanerat allanngortissinnaavaat. Tamanna uumasunut annernut tamanut annertuumik sunniuteqassaaq, taamaattoqarpat nerisarisaat allannguuteqassagamik.

Nuup Kangerlua nunarsuarmi kangerluit annerpaat akornanniippoq, kangerloorarpassuartaqarluni. Taamaattumik kangerluk nassuiaateqarfigissallugu imaannaanngilaq, sumiiffik apeqqutaalluni assiigiinngissutit annertusinnaagamik.
MarinBasis Nuuk misisissuiffiup aamma Silap Pissusiata Ilisimatusarfiup ataani suliat allat ingerlataasa ukiut tulliuttussat ingerlanerini Nuup Kangerluani pinngortitami ataqatigiinnerit, aammalu silap pissusiata allanngornerata kingunerisaanik nakkutiginneq nalunaarsuinerlu ingerlateqqissavaat.
Abstract tuluttut uannga atuaruk Marine Ecology Series

Immap uumasuaraa Microsetella norvegica ”immami aput” nerisaraa. Takissusaa 0,7 mm miss. Ass.: Kristine Engel Arendt.

Nuup avataani imarmi uumasuaqqat Calanus finmarchicus amerlasoorpassuullutik nassaassaapput. Nuup Kangerluani nassaassaanerupput Metridia longa aamma Microsetella. Nunap assinga: Pinng.