Nannut amerlanerit nalunaaqutsersorneqalersut Saqqummersinneqarfia 17.03.2010
Nannut nalunaaqutsersorneqassapput
2010-mi piffissaq 19. marts – 20. april Pinngortitaleriffik Niaqornaniit (Uummannap eqqaani) Savissivimmut (Qaanaap eqqaani) nannunik nalunaaqutsersueqqissaaq. Nannut Kalaallit Nunaata Canadallu akornanni sikuni ingerlaartarnerat, qanorlu siammarsimatiginerat, aamma nunarsuup kiatsikkiartornerata kinguneranik sikuerukkuartorneranit qanoq sunnerneqarneri paasiniarneqassammat. Misissuinerittaaq 2011-mi Baffin Bugten-imi nannunik kisitsinissamut pilersaarutaasumut allarnisaataapput.
Nannut 20-t nalunaaqutserneqassapput
Ilisimatuut nannut 20-t ilisimajunnaarsillugit qaammataasatigoortumik aallakaatitsissutilernissaat pilersaarutigaat. Arnavissat arfineq-pingasut qaqortumik qungasequtserneqassapput sinnerilu siutimikkut mikisunnguamik aallakaatitsissuserneqassallutik. Aallakaatitsissutit nannut qanoq angalaarnerat nalunaarsussavaat.
Ukioq manna sikkorluppoq
Sila ajortinnagu ilisimatuut AirGreenlandip helikopteriaraanik Niaqornat Savissiviullu avataanni sikuni saatsersuni nanorsiortassapput. Upernaaq manna Uummannap avataani sikkorloqaaq. Taamaattumik suliaq Upernavimmiit Kullorsuarmiillu aallartinneqassaaq taavalu siku tiffasinnerusumiilerpat Uummannap eqqaata tungaanut ingerlanneqassalluni.
Kia akilissavaa?
Suliaq kalaallit pisortaat sinnerlugit Pinngortitaleriffimmit ingerlanneqassaaq, qallunaallu Miljøstyrelse-annit akilerneqassalluni. Aallakaatitsissutit uumasut ukiup ingerlanerani qanoq angalaarnerat oqaluttuarisinnaavaat, ikkunneqarnissaallu akisuukasiulluni. Nannup ataatsip aallakaatitsissuserlugulu paasissutissanik tunniussugaanik misissuiffiginera 200.000 kr. miss. akeqarpoq. Taamaattumik nannut aallakaatitsissutitallit pisarineqartannginnissaat Pinngortitaleriffiup ilungersortumik inassutigaa.
Nalaatsortitsisoqassagaluarpalli
Nanoq nalunaaqutalik pisarineqassagaluarpat ingerlaannartumik nannup normua nalunaarutigiitigalugu Pinngortitaleriffimmut kalerriunneqassaaq. Siutaani normoqarpoq sigguisalu qulliit iluatungaannit illugiinnik kakiukkanik normoqarluni. Taava Pinngortitaleriffiup nanoq sumi qangalu nalunaaqutserneqarsimasoq oqaatigisinnaassavaa. Nannup nalunaaqutsikkap neqaa nalunaaqutserneraniit qaammatip aappaa avillugu nerineqartariaqanngilaq.
Nungusaatanngitsumik piniarneq?
Missuinertaaq Kalaallit Nunaaanni nannunniartarneq nungusaataanngitsumik ingerlanersoq nalilerniarlugu paasiniaanermi paasissutissanik naliliisinnaalersitsisinnaavoq. Ilumullu taamaattoqartoq paasineqassagaluarpat tunisassianik nannuneersunik avammut tunisaqarsinnaaneq ammaqqinneqarsinnaassagaluarpoq. Cites-imiit akuersissutit, ilaatigut nannunit tunisassianik nunanut allanut nioqquteqarnermi killilersuutaasut Kalaallit Nunaata Nunavullu (Canada) nanuutigeqatigiivi ikiliartuutaanngitsumik pisarineqartarpata aatsaat tunniunneqarsinnaapput.
Ilisimatuut nanoq misissoraat. Ass.: Øystein Wiig
Niviarsiaqqap Niaqornaneersup qungasequt misilippaa, april 2009. Ass.: Øystein Wiig
