Nunatta imartaani pinngortitami ataqatigiinnermi Ph.d.-doktorinngortoq nutaaq Saqqummersinneqarfia 26.08.2010
Pinngortitaleriffimmi Silap pissusianik Ilisimatusarfimmi ilisimatusartup, Martin E. Blicherip, immap naqqani uumasut angisuut, ingammik eqqusat uillullu assigiinngitsut nunatta imartaani pinngortitat ataqatigiinneranni inissisimanerat pillugu Ph. doktorinngorniutini illersoqqammerpaa.
Nunarsuup kissakkiartornerata malitsigisaanik Issittup immikkoortuani ukiuni aggersuni silap allanngorujussuarnissaa naatsorsuutigineqarpoq. Immami pinngortitat ataqatigiinnerat sunniuteqatigiittarnerallu pillugit Issittumi ilisimariikkat killeqarput.
”Taamaattumik Nuup Kangerluani immami pinngortitat mikinerpaaniit anginerpaanut uumasut kiisortut inissisimaffigisaat tikillugu ataqatigiinnerisa qulaajarneqarnerannut peqataanera ilisimatusarninni pingaarnersaasimavoq. Ilaatigut angusat Issittumi avatangiisilimmi misissuinernut allanut sanilliussinnaajumallugit ilaatigullu pinngortitat imminnut qanoq ataqatigiinnerat pillugit pingaaruteqarluinnartunik ilisimasanik pilersitsisoqarsinnaaqqullugu”, Martin Blicher oqaluttuarpoq.
Ilisimatusarneq tigooqqaveqarnissamik pilersaarusianit marluusunit aallaaveqarpoq, tigooqqaaviillu taakku silap pinngortitallu pissusiat pillugit paasissutissarpassuarnik nakkutilliisuupput katersuisuullutillu. Nuup Kangerluaniittoq MarinBasis (paasissutissanik tigooqqaavik) Issittup kiannerusortaani aamma Tunup Avannaarsuani Young Sundimi Zackenbergimiittoq MarinBasis Issittup issinnerusortaani pinngortitat imminnut ataqatigiinnerat pillugu paasissutissanik katersuiviupput.
”Siunissami silap allanngoriartornissaata sunniutigisinnaasaanik misissuinerup ilaatut nunatta imartaani immap naqqani uumasut angisuut sunniuteqaqatigiittarneranni avatangiisinut sunniutaasinnaasut pingaarnerit suussusersiniarsaraakka, tassa imaappoq stoffit arrortinneqarsinnaasut qanoq annertutiginersut, sumiiffimmi uumassusillit tamarmik qanoq oqimaatsiginerat, uumasoqatigiit suut nassaassaanersut aamma uumasut nerisareqatigiinnit anginerusunit qanoq nerisaatiginersut. Tunngaviusumik pinngortitat imminnut ataqatigiinnerannik ingerlaasiannillu paasisaqarnissaq siunissami allannguutaasinnaasut pillugit pissutaasunik nalilersuinissanut pingaaruteqarput.”
Københavns Universitet, Pinngortitaleriffik aamma Århusip Universitetiani Danmarks Miljøundersøgelser suleqatigalugit doktorinngorniut suliarineqarpoq. Nunatsinni Ilisimatuussutsikkut Misissuinerit aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup tapersiinerisigut pilersaarusiaq aningaasalerneqarpoq. Ataqatigiissaarinermi MarinBasis-mit ikiuuttoqarpoq.
Blicher (2010) Ph DBlicher, Martin E (2010):
Structure and dynamics of marine macrozoobenthos in Greenland – and the link to environmental drivers. PhD thesis (8MB). Affiliation: Greenland Climate Research Centre, Greenland Institute of Natural Resources, Department of Biology, University of Copenhagen, Department of Marine Ecology, National Environmental Research Institute (NERI), Aarhus University.
Søpindsvin på havbunden i Nuup Kangerlua/Godthåbsfjorden. Foto: Søren Rysgaard.
