*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaani imeqqutaalaq pillugu PhD-liaq ullumikkut illersorneqassaaq

Misissuisoq Carsten Egevang, Pinngortitaleriffik, ullumikkut 2. juni 2010 Kalaallit Nunaani imeqqutaalaq pillugu PhD-liani Københavns Universitetimi illersussavaa.

Carsten Egevangip suliaata Kitsissunnguani, Qeqertarsuup Tunuani kitaaniittumi aammalu Sandø-mi tunup avannaaniittumi piffissami 2002-miit 2008-mut misissuinerit saqqummersippai. Misissuinerup inerneri Kalaallit Nuunaani imeqqutaallat uumaniarnerat pillugu ilisimatuussutsikkut uppernarsaatinik pingarutilinnik takutitsipput, uumasorlu 2002 sioqqullugu ilisimasaqarfigineqarpiarsimanngitsoq pillugu ilisimasanik nutaanik tunniussilluni.

PhD-mik suliaq eqikkaanermik ilisimatuussutsikkullu allaaserisanik tallimanik imaqarpoq, taakkunanngalu ataaseq immikkut nunarsuarmi tusagassiutiniit maluginiarneqarsimalluni. Allaaserisami oqaluttuarineqarpoq imeqqutaallap ukiut tamaasa nunatsinni piaqqisarfinniit Sikuiuitsumi kujallermi ukiisarfimmut, utimullu ingerlaartarneri uumasuni tamani ingerlaartarnerit nalunaarsorneqarsimasut takinersaat. Ingerlaarfiup isorartussusaa (agguaqatigiissillugu 71.000 km) immini soqutiginarpoq, misissuinerulli aamma uppernarsivaa, qanoq imeqqutaallat ingerlaarnermi takisuumi imartat uumassusilinnik pinngorarfiulluartut pinngitsoorsinnaanngitsigigaat ingerlaarfillu sammivigissaartunik anorilik atuartaraat. Misissuineq taamaaqatimini siullersaavoq, nutaarsiassarlu januarimi nunarsuaq tamakkerlugu tusagassiutini naqitani elektroniskiusunilu ingerlaarsimavoq.

Suliamut aamma ilaavoq imeqqutaallat, manniliat siulliit annaagaangamikkit mannilioqqissinnaaneri pillugit misissuineq siulleq, imeqqutaallat neriniarnerusaat kiisalu piaqqinerup nalaani piaqqat alliartorneri uumaannarsinnaanerilu pillugit uuttuinerit. Paasissutissat taakku PhD-mi suliami misissuinermi allamut ilanngunneqarput: mannissarnerup imeqqutaallanut sunniutai pillugit ilisserutitut missingersuut (teoretisk model).

Suliamuttaaq ilaapput imeqqutaallat piujuartitsineq tunngavigalugu mannissarneqarsinnaanissaat pillugit nunatsinni oqartussanut inassuteqaatit, nunatsinnilu imeqqutaalaqarfiit qanoq nakkutigineqarsinnaanissaannut siunnersuut, kiisalu kitaani tunullu avannaani imeqqutaalaqarfinni pingaarnerni piaqqisartut amerlassusaannik missingersuutit.

Carsten Egevangip PhD-a Kommissionen for Videnskabelige Undersøgelser i Grønland-imit aningaasaliiffigineqarpoq, Pinngortitaleriffimmilu timmissanik misissuisutut sulinerup saniatigut ingerlanneqarluni. Sulinerup saniatigut Carstenip assilisanik katersuivimmi ARC-PIC.COM-imi akisussaasuuvoq, 2009-milu assilisanik unammisitsinermi akimasuumi ”Wildlife Photographer of the Year”-imi immikkoortumi ajugaasuulluni.

Paasisaqarnerujumaguit attavigikkit:

Misissuisoq Carsten Egevang caeg@natur.gl, telefon toqqaannartoq: +45 20788099

Imaluunniit immikkoortortami pisortaq Fernando Ugarte feug@natur.gl, telefoni toqqaannartoq: +299 36 12 00

Carsten Egevangip PhD-a una tooruk

Carsten Egevang Pinngortitaleriffimmeersoq geo-locatori siulleq imeqqutaallamit pisareqqinneqarsimasumeersoq tigummigaa, Sandøen, Tunup avannaa Ass: Fernando Ugarte

Geologgeri mikingaarami niumi assammiuusamut ikkunneqarsinnaavoq. Timmiaq ´pisareqqinneqartariaqarpoq´paasissutissat loggerimit piniaraanni. Ass: Carsten Egevang.