Nuup avataani Nuullu Kangerluani immap planktonillu pissuseqatigiinnerat aasaru misissorneqassapput Saqqummersinneqarfia 22.03.2010

Silap Pissusianik Ilisimatusarfiup Dansk Center for Havforskning (DCH)-imit taperserneqarnermigut aasaru 6.-23. juni 2010 imarmik ilisimatusaammik umiarsuarmit Dana-mit Nuup eqqaani imaq misissuiffigissavaa.
Imarmik misissuineq siulersorneqassaaq professor Torkel Gissel Nielsen-imit, www.aqua.dtu.dk/English.aspx Silap Pissusianik Ilisimatusarfiup suliaanik Nunani issittuni planktonit – silap pissusaani allanngortumi siulersuisuusumit.
Nuup avataani (Fyllas Banke), Nuup kangerluani aammalu kangerluup qinnguani Sermersuup iigartartuisa eqqaani, Kapisillillu kangerluani immap planktonillu imminnut sunniivigeqatigiinnerat misissorneqarnissaat siunertaavoq. (takuuk takussutissiaq).

Misissuinermi qitiutinneqassapput immap kissassutaata tarajoqassusaatalu issittumi/ issitullu kiannerulaartortaani uumassuseqartunut planktoninilu pinngortitami ataqatigiinnermut sunniutaat.

Sisamat immikkoortut misissuiffigineqartussat (ammalortut tungujortut takussutissiami)

• Nuup avataa (Fyllas Banke), tassani immap pissusai assigiinngitsut naapiffeqartut. Sumiiffik aalisagaaqqanut, planktonillu pinngorfianut katitigaanerannullu pingaaruteqarpoq.
• Nuup kangerluata paavani, imaq avataaneersoq Nuup kangerluanit sarfartumit imarmut akuleruuttarpoq, tamanna planktoninik aalisagaaqqanillu pinngorarfiulluarpoq.
• Nuup kangerlua ilorleq Sermersuarmit imermit kuuttumit sunnigaasarpoq. Qaligualillit mikisut ulloq unnuarlu ingerlaarnerat pingaartillugu misissorneqassaaq.
• Kapisillit kangerluanni saarullinnut saarulleeqqat planktonillu nerisatut pingaaruteqarnerat misissorluarneqassaaq.

Misissuinerni inernerit paasinarsisissavaat qanoq avatangiisini pissutsit assigiinngitsut imaqarfiit assigiinngitsut qanoq sunniivigisarneraat, aammalu modeliliorluni sulinermut ingerlaavartumut aammalu silap pissusiata allanngornerisa sunniutigisinnaasaanik paasissutissanik katersiffiussallutik.
Tamakku saniatigut siunissami silap pissusiata issittumi/ issittullu kiannerulaartortaani pinngortitami ataqatigiinnerit misissorneqartarnissaannut paasisat tunngaviliisussaapput.

Misissuisuussapput ilisimatuussutsikkut suleqatigiit nunat assigiinngitsuneersut: Danmarks Tekniske Universitet (DTU), Pinngortitaleriffik, Danmarks Miljøundersøgelser (DMI), AU aammalu allat europamiut amerikamiullu ilisimatusarfii assigiinngitsut.

Sumiiffiit sisamat misissuiffigineqartussat (ammalortut tungujortut): Nuup avataani imaq, Nuup Kangerluata paava, kangerluup qinngua aammalu Kapisillit kangerluat.

Misissuinerit imarmik ilisimatusaammit Dana-mit ingerlanneqassapput. Ass.: Søren Rysgaard.