Tunumi appat erniorfiinik takusaaneq Saqqummersinneqarfia 19.08.2010
Ittoqqortoormiit avataani appat erniorfii juulip naalernerani biologinit David Boertmannimit (Danmarks Miljøundersøgelser – DMU) aamma Aili L. Labansenimit (Pinngortitaleriffik) tikinneqarput takusaanermilu piniarfinnik nakkutilliisoq, Erling Madsen, peqataavoq.
Kangertitivap paavani appat erniorfii Kangertittivap paavata kujataatungaaniittoq Kangikajik aamma avannaatungaaniittoq Appalik Tunumi appat erniorfigaat. Appat erniorfii taakku aamma taateraanit erniorfigineqartartut Pinngortitaleriffimmi kisitsinissamik pilersaarusiaq malillugu aappaagu kisitsiffigineqassapput. Appat taateraallu nunatsinni timmissat piniarneqartartut pingaarnersaraat taamaattumillu timmiaqatigiit taakku amerlassusaasa nakkutigineqarnissaat Pinngortitaleriffimmi pisussaaffigineqarpoq. Taakku saniatigut aatsitassanik misissuinerni avatangiisinik naliliinermi timmiaqatigiit amerlassusaasa ilisimanissaat pingaaruteqarpoq. Erniorfiit taaneqartut kingullermik 2004-mi kisitsiffigineqarput.
Ittoqqortoormiinut suliat tikillugit sulinermi ilaatigut timmissat ulluiniinneranni toqqaannartumik kisitsisoqarpoq ilaatigullu erniorfinnik assiliiortortoqarluni assilisallu kingusinnerusukkut kisinneqassapput. Pilersaarut malillugu aamma Kangikajimmi erniorfiup ilaanik aalajangersimasumik ulluni arlalinni ullormut arlaleriarluni assiliisoqartarluni aamma nakkutilliisoqartussaavoq. Tamannali ajoraluartumik pisinnaasimanngilaq, tassami kangerlorujussuup 30 kilometerinit ikertunerusup anori pujorlu pissutigalugit ikaarnissaa ajornarsimammat qaaffiumisaarnersuillu erniorfiit ataannut nunninnissaq ajornartimmagu.
Kangerlummi sikoqartinnagu sineriallu sikorsuaqartinnagu kangerluk immamit qaffiumisaartinneqartarpoq kangerlummiillu aamma anisarnertarluni isersarnertarlunilu. Taamaalilluni kangerluup ikaarnissaa ajornakusoorsinnaasarpoq, naak Ittoqqortoormiit silagikkaluartoq ´ piniarfinnik nakkutilliisoq, Erling Madsen, oqaluttuarpoq.
Pingaarnerpaarli iluatsippoq tassalu appat erniorfiannik marlunnik appat erniortut amerlassusaannik kisitsinissaq aamma siusinnerusukkut kisitsisimanernut sanilliussinissaq siunertaralugit assiliiortornissaq. Marloriarluni iluatsinngitsumik misiliigaluariarluta ullullu arlallit illoqarfimmeeriarluta, tassani pujoq, malissuit qaafiumisaarnerujussuillu ernumalluta isiginnaariarlugit, ullut tallimassaanni Appalimmi appat erniorfiannut kiisami pivugut. Franskit aappariit Janusz aamma Joelle Kurbielikkut angallamminnik anginerusumik ”Vagabond ellemik” Appalimmukaakkumammatigut Appalik tikissinnaasimavarput.
Tamatuma saniatigut Uunartip eqqaani taateraat erniorfiat manna tikillugu nunatsinni immap timmiaasa erniorfii pillugit paasissutissaasivimmut nalunaarsorneqarsimanngitsoq takuneqarpoq. Kiisalu najukkami ilisimasalinnit inuusukkallaramik innartorlutik appat manniinik mannissarniartarsimasunit appat erniorfiat pillugu ilisimasanik oqaluttuunneqarpugut.
Paasissutissanik amerlanerusunik pissarsiniaruit biolog Aili L. Labansen attaveqarfigineqarsinnaavoq
