*Required
*Required
*Required
*Required
*Required
*Required
*Required
*Required
Send
Thank you for your application!
 

Tunup kujataani mitit siulllerpaamik kisinneqarsimasut

Tunup kujataa nunatsinni misissuiffigineqannginnerpaat ilagaat. Tamanna Pinngortitaleriffimmi biologit maannakkut iluarsiiffigaat. 2008-mi juunimi Nunap Isuaniit Ittoqqortoormiit tungaanut sineriak siullermeerluni timmisartumit misissuiffigineqarpoq. Tamaani inuit angalasartut ikittuinnaasarput, tassami sineriammi sumiiffiit ilaat tikikkuminaatsorujussuupput imarlu ukiup annersaani sikoqartaqaluni. Annertuumik kisitsinerni inernerit pillugit teknikkikkut nalunaarusiaq nr. 81 maannakkut Pinngortitaleriffiup nittartagaani atuarneqarsinnaalerpoq.

Mitit erniortut siullermeerluni kisinneqarnissaat siunertaavoq. “Manna tikillugu Tunup kujataa mitit pillugit paasissutissat eqqarsaatigalugit ilisimasaqarfigineqarpiarsimanngilaq. Mitillu nunatsinni piniagassat pingaarnerit ilagimmatigit tamaani qanoq amerlatigisunik miteqarnersoq paasissallugu pingaaruteqarpoq,” Flemming Merkel, kisitsinermut akisussaasuusoq oqarpoq.

Mitit naajallu erniorfii nutaarpassuit manna tikillugu ilisimaneqarsimanngitsut nalunaarsorneqarput. Mitit erniortut aappariit ilimagineqartutut ikittuinnaallutik 1.600-t 3.200-llu akornanni amerlassuseqarput. Erniortut amerlanersaat sumiiffinni aatsaat sikoqanngitsuniilersuniittut nassaarineqarput. Mitit erniortut ilaat nunatsinni sumiiffinni allanut sanilliullugit aappariikkuutaat ataasiakkaajullutik erniortarnertik allaanerussutigaat, tamanna Tunuup kujataani terianniakinneruneranik pissuteqarsimagunarpoq.

Isasarnerat ilisimaneqarsimanngitsoq paasineqarpoq

Sumiiffimmi mitit erniortut saniatigut mitit 10.000-it sinneqartut Islandimi erniortartutut ilimagineqartut erniornermilli kingorna Tunup kujataaliartartut sumiifimmiipput. Tassani sulumik meqqui katattarpaat (isasarput) taamaattumillu piffissap ilaani timmisinnaaneq ajorlutik. Taamatut isasarnerat siornatigut ilisimaneqarsimanngikkaluarpoq mitillu Islandimeersut suli amerlanerunissaat ilimagineqarpoq.

Puisit qasigissat nunatsinni 1960 – 1970-kkunnili qaqutiguulereersimapput. Taamaattumik qasigissat sumiittarnerisa misissorlugit paasinissaat immikkut pingaaruteqarpoq. Tunup kujataani sumiiffiit ilaanni siusinnerusukkut qasigissanik naammattoorsiffiusarsimasut kinguneqanngitsumik misissuiffigineqarput. 2009-mili augustimi tassunga sumiiffimmukarnermi suli qasigissanik puiseqartoq paasineqarpoq.

Immap uumasui miluumasut allat aamma nalunaarsorneqarput naammattoorneqartulllu maluginiagassat ilaat tassaavoq arfivik piaraq, taamaalilluni Spitsbergenip arfivii nungutaanissaminnik navianartorsiortut kinguaassiorsinnaasut paasineqarput.

Attaveqaatit:
Flemming Merkel tlf. 0045 4601933 – email
Lars Maltha Rasmussen tlf. 00299 361200 – email

Tasiilap eqqaani Sermilik Tunup kujataani kangerluit sikuiaarnerusartut ilagaat. Ass.: Lars Maltha Rasmussen

Arfivik, Blosseviillekysten. Ass.: Flemming Merkel