*Required
*Required
*Required
*Required
*Required
*Required
*Required
*Required
Send
Thank you for your application!
 

Ilisimatusarnermut atortut nutaat SPI Utoqqarmiut Kangerluarsunnguani misilerarpaat Saqqummersinneqarfia 10.07.2011

Ph.d-nngorniummik pilersaaarusiamik suliaqartut Silap Pissusianik Ilisimatusarfimmi ilisimatusartut aamma Syddansk Universitetimi ilisimatusartut suleqatigalugit sapaatit akunnerini kingullerni uuttortaatit nutaaliaalluinnartut Utoqqarmiut Kangerluarsunnguani misilerarpaat.

Misileraanermi erngup Sermersuarmit aattoq Kangersunermut Nuullu Kangerluanut ingerlaqqittoq qanoq annertutiginersoq uuttortarneqarsinnaanngornissaa anguniaavoq pingaarneq. Erngup Sermersuarmit kuuttup annertussusianik ilisimasaqarneq silamik ilisimatusarnermi pingaarutillit ilagaat, tassami kangerlummi imeqassutsimik allannguisarami taamaalillunilu pinngortitami ataqatigiinnermut kangerlummilu uumassutsinut sunniuteqartarluni.

Utoqqarmiut Kangerluarsunnguani uuttortaasoqalinnginnerani pissutsini ilisimaneqartuni periutsit uuttortaatillu pitsanngorsaqqaarniarneqarput, pitsanngorsaanissamullu Utoqqarmiut Kangerluarsunnguat toqqarneqarsimavoq. Tamatumunnga pissutaasoq tassaavoq erngup nukinganik nukissiorfik tassaniimmat, tassanngaanniillu erngup Utoqqarmiut Kangerluarsunnguanut kuuttup qanoq annertutiginera eqqoqqissaartumik ilisimaneqarmat. Taamaalilluni Silap Pissusianik Ilisimatusarfimmiut uuttortaataasa takutitaat erngup nukinganik nukissiorfimmiut uuttortaataasa takutitaannut assersuunneqarsinnaassapput taamaalillunilu uuttortaatit uuttortaariaaserlu eqqortumik atorsinnaanersut uppernarsarneqarsinnaassallutik.

Uuttortaanermut atortut assigiinngitsut atorlugit uuttortaasoqassaaq. Ilaatigut immamik ilisimatusarnermi atortut misiligarluarneqareersimasut tutsuiginartullu atorneqassapput, tassunga ilanngullugit ADCP (Acoustic Doppler Current Profiler), taassuma immap sarfaata sukkassusia uuttortartarpaa aamma CTD (Conductivity, Temperature, Depth), taassuma immap tarajoqassusia/kiassusia/itissusialu uuttortartarpai. Atortut nutaanerusut microstructure profilers-inik taaneqartartut marlussuit aamma atorneqassapput. Taakku immap qummut ammullu ingerlanerani qummut ingerlarnga / erngup aalarulunnera uuttortartarpaat. Atortunit assigiinngitsunit uuttortaanernit paasissutissat immami nukimmik naatsorsuinermut atorneqassapput, tamakkulu erngup nukinganik nukissiorfimmit Sermersuarmilluunniit erngup aniasup annertussusianik missingiinermi kingusinnerusukkut atorneqassapput.

Kunuk Lennertip, pilersaarusiamik aqutsisuusup Ph.D-nngorniartuusullu suliat tikillugit sulineq pilersaarutit malillugit ingerlasoq aamma sapaatit akunnerini arlalinni uuttortaanernit paasissutissarpassuit suliarineqartussaasut paasissutissiissutigaa. Suut tamarmik ajunngitsumik ingerlappata Nuup Kangerluani 2012-imi aasakkut uuttortaasoqarsinnaassaaq.

MSS profiler SCAMP-imik uuttortaammit angineruvoq, taannalu immap iluani aniartornermini uuttortaanani kiviartornermini uuttortaasarpoq. Uuttortaanermit paasissutissat kabeli iluaqutigalugu toqqaannartumik qarasaasiakkut takuneqarsinnaapput, taanna immap naqqanut pigaangat sipilimik amoorneqartarpoq. Uuttortaat taanna 600 meterinik ititigisumi atorneqarsinnaavoq. Assiliisoq: Sabine Flury.