Immap sikuanik ilisimatusarnissamut nutaanik atortuliortoqarpoq Saqqummersinneqarfia 08.07.2011
Canadami Winnipegimi University of Manitobami, taanna Nuummi Silap Pissusianik Ilisimatusarfimmit qanimut suleqatigineqarpoq, maannakkut imatut taaneqartartumik sanaartortoqaleruttorpoq: ”Sea-ice Environmental Research Facility” (SERF). Taanna Canadami immap sikuanik ilisimatusarnermi atortuni siullersaavoq. Sapaatit akunnerini makkunani University of Manitobap eqqaani silami ”imiisivissuarmik” (udendørs bassin) sanaartortoqarpoq. Imiisivissuaq immap sikuanik ilisimatusarnermi atortunik atortulersorneqassaaq.
SERF-imi immap sikuanik nakkutigineqarsinnaasumik pilersitsinikkut atortut iluaqutigalugit immap, immap sikuata silallu imminnut ataqatigiinnerannik tunngaviusumik paasinnittarnitta annertusarneqarnissaa siunertaralugu uumasuaqqanik tappiorannartunik misissuisoqarsinnaalissaaq. SERF-imi misileraalluni misissuinerit, Issittup Imartaani umiarsuarmi Canadamiut sikunik aserorterutaataanni ”Amundsen”-imi taamatut suliat tikillugit misissuinerit iluatigalugit, iluaqutigalugit Issittup imartaata sikuata sukkasuumik annikilligaluttuinnarnerata kingunerisassaanik, tamatuma silamut qanoq kinguneqarsinnaanera, assartuinissanut aqqutissanik, gassit stoffillu mingutsitsisuusut sannaasa kemiskiusut kaaviiaarnissaannik inuillu immap sikuani atuinissaannik, siulittuisinnaanerput pitsanngorsassavarput.
Ukiukkut immap sikuata nunarsuarmi tamarmi immap 7 %-iata missaa qallertarpaa. Taamatut immap, immap sikuata silaannaallu ”killeqarfiini” sikusarnera, sikup issutsikkiartortarnera aakkiartortarneralu tamakkua ”killeqarfiini” uumasuaqqanut tappiorannartunut annertuumik sunniuteqartarput. Aasakkut immap sikuata sukkasuumik annikilliartornera nunarsuarmi silap allanngoriartorneranut takussutissat ersarinnersaraat. Taamatut ingerlasoqaannassappat piffissami ungasissorsuunngitsumi Issittup Imartaa aasakkut sikoqartarunnaassaaq, pisoq ikinnerpaamik ukiuni millionini ataatsini pisimanngisaannartoq. Allannguutit tamakku nunarsuarmi tamarmi silamik sunniinerat, Issittumi innuttaasut inuuniarnerminni atugaannik, nuna pillugu politiki oqartussaaffiginninnermullu tunngasut ingasaallugit nalilersuiffigineqarsinnaanngillat (nalilersuineq killilerneqarsinnaanngilaq).
Atortut atorneqalerunik imermik 400 m3-it missaannik immerneqassapput taratsumillu 7 tonsit missaannik akuneqassallutik, taamaalilluni maannakkut immami tarajoqassusermut assingulerlutik.
SERF-imi atortut Canada Foundation for Innovation (CFI), the Manitoba Innovation Fond aamma University of Manitoba-mit aningaasaliiffigineqarput. Pilersaarusiaq Dr. Fei Wang, Dr. Tim Papakyriakou, Dr. David Barber aamma Dr. Søren Rysgaardimit aqunneqarpoq.
Sea-ice Environmental Research Facility, University of Manitoba, Winnipeg. Foto: Feiyue Wang
Foto: Peter Schmidt Mikkelsen
Foto: Peter Schmidt Mikkelsen
