Islandimi præsidentip Silap Pissusianik Ilisimatusarfik pulaaraa Saqqummersinneqarfia 08.09.2011
Islandimi præsidentip, Ólafur Ragnar Grímssonip, ulluni makkunani Nuummut tikeraarnermini Kuupik Kleist peqatigalugu nunanit tamalaaneersut Issittumi inatsiseqartitsineq pillugu isumasioqatigiinnissaat ammarnersiorniarpaa. Isumasioqatigiinneq Akureyrimi Polar Law Institutemi aamma Akureyrimi Universitymi, tamarmik Islandimiittut aamma Ilisimatusarfimmi ilisimatusartut suleqatigiinnerisigut aaqqissuunneqarpoq.
Præsident Grímsson silami pissutsinik silallu allanngoriartorneranik soqutigisaqartorujussuuvoq taamaattumillu Nuummiinnini iluatsillugu Silap Pissusianik Ilisimatusarfimmiunik naapeqateqarusuttorujussuulluni. Ataatsimiinnermi præsidentip ilaatigut Issittup silamillu ilisimatusarnerup nunanit tamalaanit soqutigineqaleraluttuinnarnera eqqartorpai, nunani qangaaniilli Issittumut attuumassuteqartuinnaanngitsunit ingammilli nunanit soorlu Kinamit, Indiamit Koreamillu. Issittumik silallu allanngoriartorneranik ilisimatusarnermik soqutiginninnerulerneq Islandimi nunatsinnilu assut malunnarpoq, taamaattumillu suliassaqarfiusumi tamatumani Islandimiut nunatsinneersullu suleqatigiinnerulernissaat præsident Grímssonip kaammattuutigaa.
