Kalaallit Nunaata imartaani puisit pillugit atuagaq nutaaq Saqqummersinneqarfia 18.01.2011
Kalaallit Nunaata imartaani puisit pillugit atuagaq nutaaq maannakkut Ilinniusiorfimmit saqqummersinneqarpoq. Atuakkiortuuvoq Aqqalu Rosing-Asvid, Pinngortitaleriffik, atuakkamilu Kalaallit Nunaata imartaani puisit pillugit ilisimasat nutaat kikkunnillu tamanit pissarsiarineqarsinnaasut saqqummiunneqarput.
Atuagaq Aage V. Jensenip Aningaasaateqarfiinit tapiissuteqartoqarneratigut saqqummersinneqarpoq atuagarlu Ilinniusiorfimmit, Pinngortitaleriffimmit aamma Aage V. Jensenip Aningaasaateqarfiinit atuakkat saqqummersinneqartut arlallit nanginneraat. Atuakkat tamakku saqqummersinneqarsimasut ukiup arferinut, nannunut aarrinullu tunngassuteqarput. Puisit ullutsinni Kalaallit Nunaanni ulluinnarni inuunermut pingaarutilerujussuupput. Maannakkut puisittarineqartartut aatsaat taama amerlatigilerput. Puisit ukiumut pisarineqartartut 150.000-it missaanniipput puisillu neqaat innuttaasut ilarpassuinut pisuussutaapput pingaarutillit. Inuit piniarnerinnarmik inuussutissarsiuteqartut 2.500-rujuusut ilarpassuinut puisit amii pingaarnertut isertitaqaataaffiusarput qanittorlu tikillugu inuit 55-75-it missaaniittut ammerivimmi Great Greenlandimi sulisuusimapput. Inuppassuit namminerisaminnik mersortarfinniluuniit mikinerusuni ammerisartut aamma ilanngunneqassapput.
Atuagaq nutaaq ilisimatuussutsikkut sammisamit puisinit saqqummiussatut allagaavoq. Atuakkamik saqqummersitsinermi atuakkap Kalaallit Nunaanni ilinniarfinni aamma Kalaallit Nunaanni pinngortitamik soqutiginnittunit tamanit atorneqarnissaa anguniagaavoq. Atuakkami puisit ilaasa pissuserisartagaat assigiit allaaserineqarput kisiannili puisit immikkut piginnaasaqalertarnerat aamma atuakkami pingaartillugu allaaserineqarpoq, immikkummi piginnaasat puiseqatigiikkuutaanik immikkuullarissunngortitsisarput pinngortitamilu ataqatigiinnermut pingaaruteqartarlutik. Inuppassuit isumaqartarput puisit uumasoqatigiiusut ataatsit, kisianni uumasoqatigiinnut ataatsinut puisi ataatsimut taaguutaavoq, puiseqatigiillu assigiinngitsut arfinillit Kalaallit Nunaata imartaani uumasuupput. Taamaattumik atuakkamik atuarnermi puisit suunerat pillugit paasinnittarneq allannguallatsinneqarsinnaalluarpoq.
Atuagaq oqaatsit assigiinngitsut pingasut atorlugit saqqmmersinneqarpoq: kalaallisut, danskisut tuluttullu.
Atuartitsinermi atuagassiaq, Kalaallit Nunaata puisai, Ilisimatuup, Aqqalu Rosing-Asvid-ip, allassimavaa. Ass. Fernando Ugarte
Atuakkat taakku nittartakkakkut pisiarineqarsinnaapput.
Paasissutissanik amerlanerusunik pissarsiniaraanni attaveqarfissaq: ilisimatusartoq Aqqalu Rosing-Asvid, Pinngortitaleriffik, oqarasuaat+299 361247 imaluunniit e-mailikkut: aqro@natur.gl
Imaluunniit imm. pisortaq, Fernando Ugarte: +299 36 12 42, e-mail feug@natur.gl
