Kinguppanniarneq 25 %-imik appartariaqarpoq Saqqummersinneqarfia 04.11.2011
Pinngortitaleriffiup misissuinerisa takutippaat Kitaata kinguppai suli ikiliartortut. Taamaattumik Kitaani 2012-imi kinguppattassanik siunnersuuteqarneqarmi pisaasussat annerpaamik 90.000 tonsiunissaat siunnersuutigineqarpoq, taakkualu ukiumut kingullermut siunnersuutigineqartunit 25%-imik ikinnerupput.
Ukiuni arlaqalersuni biologit kinguppaat ikiliartornerat erseqqissartarsimavaat, siunnersuuteqarnerullu sukateriffigineqarneranut pissutaasut pingaarnerit makkuupput:
- Biomasse 2005-imiilli annikilliartornera
- Kinguppaaqqaat ukiuni aggersuni aalisarnermut ilaalerumaartut akuliussuunnerat suli annikippallaarnerat
- Eqimattakkuutaat siammarfikinnerulersimanerat
- Saarulleeqqat amerleriangaatsiarnerisa raajat eqimattakkuutaat ajoqutaasumik sunnersimanerat
Biomasse (tassa: kinguppaat tamakkivillutik amerlassusiat) ukiuni arlaqalersuni annikilliartuaartuarsimavoq, kinguppaat nassaassaaffiat annikilliartuinnarsimavoq aammattaarlu kinguppaaqqat aalisarnermut ilanngukkiartortut ukiuni arlaqalersuni amerlanngitsuinnaasarsimallutik. Tamatumalu saniatigut uumassusilinnik misissuinerit takutippaat saarulleeqqat malunnartumik amerleriarsimasut, tamannalu qularnanngitsumik kinguppaat toqusartut amerlanerulernerannik kinguneqassaaq saarulliimmi kinguppaarartortuummata. Oqaluttuarisaaneq kingumut qiviaraanni saarulleqarnera kinguppaqarneranut sunniutilerujussuusarsimavoq, saarulleqarneruleraangat kinguppaat ikilisarlutik.
Tunumut tunngatillugu 2012-mut siunnersuut 12.400 tonsiuvoq, tassa siornamit allanngornani.
attavigineqarsinnaalluni: Helle Siegstad, Afdelingschef 36 12 00 eller mail: hesi@natur.gl
