*Required
*Required
*Required
*Required
*Required
*Required
*Required
*Required
Send
Thank you for your application!
 

Narsap Sermia ukioq-manna Nuup Kangerluanut anisorsuuvoq (2010/2011) Saqqummersinneqarfia 08.05.2011

Nuup Kangerluani sikut ukioq-manna ukiunut siuliinut naleqqiullugit immikkut illuinnartuupput. Ukiuunerani Nuup eqqaani kangerluk sikuusimaqaaq Narsallu Sermianit anisumik sikoqaqaluni, massa ukiut siuliini Nuup eqqaani kangerluk annikitsuinnarmik sikusimasoq Narsallu Sermianit anisumik piffissap ilaannaani annikitsuinnarmillu sikoqartarsimasoq. Silap Pissusianik Ilisimatusarfimmiut aamma Pinngortitaleriffimmiut  2008-miilli Nuup Kangerlua aamma sermip iigartarfii pingasut Nuup Kangerluanut toqqaannartumik atassuteqartut (Narsap Sermia, Akugdlersûp Sermia aamma Kangiata Nunâta Sermia) qitiutillugit misissuiffigisimavaat. Nuup Kangerlua ullumikkut Silap Pissusianik Ilisimatusarfimmiunit Kalaallit Nunaani, Danmarkimi nunanilu tamalaani ilisimatusarfiit suleqatigalugit misissuiffigineqarpoq. Misissuinermut tassunga qaammataasat, kangerlummi puttaqutit, assiliissutit nakkutilliissutit, sumiissusersiutit GPS-it atorlugit uuttortaanerit  aamma umiarsuarnit/angallatinit alaatsinnaannerit atorneqarput.

2010/2011-imi ukioq ukiunut siuliinut sanilliullugu sooq immikkut ittuua? 2010-mi silaannaq kiattorujussuusoq inuppassuarnit ilisimaneqarpoq. Kangerluk ukiakkut ukiukkullu immikkut ittumik kiattorujussuusoq Silap Pissusianik Ilisimatusarfimmiut aamma ilisimavaat. Tamatuma kingunerisaanik kangerluup sikua saattuararsuuvoq Narsallu Sermianit sermeq anisoq uninngatissinnaanagu. Taamaalilluni Narsap Sermianit anisoq akornusersorneqarani ukioq naallugu kangerlummit aniasinnaasimavoq. Ukiut siuliini sermeq anisoq Nuuk tikitsinnagu kangerlummi aareertarpoq. Siullermik ukiuunerani kangerluup sikuanit issusuumit uninngatinneqariarluni kingusinnerusukkullu aasaanerani isersarnimit uninngatinneqarluni. Kangerluup qinngua aasakkut kiattaqaaq sikulu sukkasuumik aattarluni.

Nuup Kangerlua Nuummit isigalugu, 1. maaji 2011. Assiliisoq: Søren Rysgaard.

2010-mi oktobarip ulluisa 15-ani aamma 2011-mi apriilip ulluisa 25-ani Narsap Sermia qaammataasamit assilisaq. Assilisat marluk taakku akornanni sermip iigartartup eqqaani sermeq 5,2 kvadratkilometerit missaanniittoq aassimavoq.