Nuup Kangerluata nunarsuullu silaannartaata CO2-mik paarlaasseqatigiittarnerat Saqqummersinneqarfia 22.09.2011

Nunarsuup silaannartaani CO2-qassutsip silap allanngoriartorneranut takusatsinnut sunniuteqaleraluttuinnarnerata ersarissigaluttuinnarnera ilutigalugu CO2-mik taassumallu pinngortitami kaaviaarneranik ilisimasat siunissami silap allanngoriartornerata annertussusissaannik siulittuisinnaanitsinnut pingaaruteqaleraluttuinnarput. Pissutsit amerlasoorpassuit apeqqutaatillugit immap nunarsuullu silaannaata akornanni CO2-mik  pingaarutilimmik paarlaasseqatigiittoqartarpoq. Qanittoq tikillugu ilisimatusartut isumaqarsimagaluarput immap sikua taamatut paarlaasseqatigiittarnermik mattussisuusartoq qanittukkulli ilisimatusarnerit ilimanarsisippaat suli sikuugaluartoq paarlaasseqatigiittoqartartoq aamma ukiup sikuata annertussusia upernaakkullu aakkiartortarnera immap qaavani CO2-mik annikippallaamik pilersitsisartoq taamaalillunilu nunarsuup silaannartaanit immamut CO2-mik annertoorujussuarmik pilersuisoqartartoq.

PhD-nngorniutigalugu pilersaarusiami Aarhus Universitetimi aamma Pinngortitaleriffimmi suleqatigiissutigineqartumi immap sikuata nunarsuullu silaannartaata akornanni CO2-mik paarlaasseqatigiittarneq qulaajaaffigineqassaaq. Nunarsuup silaannartaanik uuttortaatit misileraanerup aallartinneqarnerani Nuup Kangerluani qeqertanut inissinneqarsimapput tassanilu ukioq naallugu uuttortaasinneqassallutik. Tamatuma kingorna uuttortaatit Tunup Avannaarsuani Zackenbergimut nuunneqassaput, tassanilu immap sikua upernaakkut aattulerpat immap sikuata nunarsuullu silaannartaata akornanni CO2-mik paarlaaasseqatigiittarnerit  ilisimatusartut uuttortassavaat.

Assit tamarmik Nuup Kangerluani qeqertaneersuupput.

Foto: Jakob Sievers