Pinngortitaleriffimmi ilisimatusartut Tunumi nannunik nalunaaqutsersuiniarput Saqqummersinneqarfia 25.07.2011
Pinngortitaleriffimmi ilisimatusartut pingasut juulip ulluisa 26-aniit augustip ulluisa qulingata tungaanut Tunup kujataani Tasiilap Nunap Isuatalu akornanni qaammataaasanut nassitsissutinik nannunut ikkussuiniarput.
GEUS-imik aamma nunatsinni Danmarkimilu De nationale geologiske undersøgelser-imik sumiiffimmi umiarsuaateqartunik qulimiguuliuteqartunillu suleqateqarneq pissutigalugu Pinngortitaleriffimmi ilisimatusartut sumiiffimmi suliaqarnissaminnut periarfissarsipput.
Nannut sumiissuserniarlugit ilisimatusartut sineriak sinerlugu qulimiguulimmik ingerlaartassapput. Nannut ilisimajunnaarsinneqareeraangata qaammataasanut nassitsissutit nannunut ilisimatusartunit ikkussuunneqartassapput. Nannut nalunaaqutserneqarsimasut nannunnianit takusinnaaniassammata aamma pisarinnginniassammatigit nannut amiisigut normunik nalunaaqutserneqartassapput. Normut qaammat ataaseq qaangiukkaangat katattarput.
Nannup ataatsip nalunaaqutserneqarnera 100.000 koruunit missaannik akeqartarpoq taamaattumillu nannut nalunaaqutserneqarsimasut pisarineqartannginnissaat Pinngortitaleriffimmit nannunnianut kaammattuutigineqarpoq. Nannunik nalunaaqutserneqarsimasunik pisaqartoqassagaluarpat Pinngortitaleriffimmiut ingerlaannaq ilisimatinneqassapput. Nannut ilisimajunnaarsinneqarneranniit nalunaaaqutserneqarneranniillu qaammat ataaseq qaangiutsinnagu tamakku neqaat nerineqassanngillat.
Tunumi nannunik sumiissusernerit sananeqaataannillu misissuinerit Tunumi nanoqatigiit (pissuseqatigiit) ataatsit sinnerlugit allanik nanoqatigeeqarnersoq paasiniaanermut ilaatigut atorneqassapput tamannalu nannunniartarnerit nanoqatigiinnut nanoqatigiilluunniit amerlassusiannut qanoq sunniuteqartarnersoq paasiniaanernut aamma atorneqassaaq.
Paasissutissaateqannginneq pissutigalugu manna tikillugu mianersortumik tunngaveqarluni Tunumi nannunik aqutsisoqassasoq Pinngortitaleriffimmit Naalakkersuisunut siunnersuisoqartarpoq. Tassa imaappoq Tunumi nannut qanoq amerlatiginerat ilisimanngikkaanni nannuttassiisarnerni tunuarsimaartoqassasoq. Misissuineq Danmarkimi avatangiisinik misissuisoqarfimmit (Miljøundersøgelser) aningaasatigut tapiiffigineqarpoq.
Paasissutissanik amerlanerusunik pissarsiniaraanni attaveqarfissat: ilisimatusartoq angajulleq, Erik W. Born
oqarasuaat +45 32 83 38 25 imaluunniit oqarasuaat angallattagaq + 40 25 79 42 e-mail: ewb@ghsdk
Imaluunniit
Immikkoortortaqarfimmi pisortaq, Fernando Ugarte, oqarasuaat 36 12 42 imaluunniit e-mail: feug@natur.gl
