Pinngortitaleriffimmiut Avannaani nannunik qaammataasanut nassitsissusersuiniarput Saqqummersinneqarfia 28.03.2011
Pinngortitaleriffimmi ilisimatusartut sisamat Kullorsuup avataani Qimusseriarsuullu ilaani marsip ulluisa 31-aniit apriilip ulluisa 20-ata tungaanut nannut qaammataasanut nassitsissusersorniarpaat.
Nannut arnavissat inersimasut 15-it nassitsissutinik qungasequserneqarnissaat aamma nannut angutivissat inersimasut inuusukaajunerillu 15-it siutaasigut nassitsissutinik mikisunik pilerneqarnissaat pilersaarutigineqarpoq. Ilisimatusartut nannut sumiissusersiniarlugit qulimiguulimmik sikup qulaatigut ingerlaartarniarput. Nannut nalunaaqutserneqariikkat pisareqqinnissaat pinngitsoorniarlugu, nannullu qaammataasanut nassitsissuteqartut nannunnianit takuneqarsinnaaniassammata, meqquisigut normunik nalunaaqutserneqartassapput.
Normu nannut meqquaniit qaammat ataaseq qaangiuppat peerutissaaq.
Nannumik ataatsimik nassitsissusiineq 100.000 koruunit missaannik akeqarpoq, taamaattumillu nannut nalunaaqutsikkat pisarineqannginnissaat kissaatigineqarpoq.
Nanoq nalunaaqutsigaq pisarineqassagaluarpat Pinngortitaleriffimmiut ingerlaannaq ilisimatinneqarnissartik kissaatigaat. Nannup nalunaaqutserneqarneraniitt ilisimajunnaartinneqarneraniillu qaammatip ataatsip iluani nalunaaqutsikkamik nannuttoqassagaluarpat nerineqarnissaa kajumissarutigineqanngilaq.
Nanoq nassitsissuserneqarnermini misiligutissanillu assigiinngitsunik tigusiffigineqarnermi nalaani ilisimajunaartinneqarsimassaaq.
Nassitsisssutit nannut ingerlaarfii pillugit paasissutissanik nassitsiortussapput taamaalilluni nannut sumiikkajunnerusarnersut paasisaqarfigineqassalluni.
Nannut siutaanni nassitsissuteeqqat ukiup affaa tikillugu atuussinnaapput arnavissanullu qungasequtsiunneqartut ukiuni arlalinni atuussinnaallutik. Avannaani immami uuliamik ujaasiffissatut sumiiffinnut atugassiisutigineqartunut sanilliullugit nannut aqqutinnaavisa qulaajarneqarnissaat siunertarineqarpoq.
Paasissutissat uuliamik ujaasinermi immaqalu ullut ilaanni uuliamik piiaalernermi nannut qanoq sunnerneqarsinnaanissaannik nalilersuinermut ilanngunneqassapput.
Siorna Avannaani nannut 29-t nalunaaqutserneqarput 2009-milu nannut 16-it nalunaaqutserneqarlutik.
Ilisimatusartoq angajulleq nannunik nalunaaqutsersuinermi aqutsisuusoq Erik W. Born oqarasuaatikkut +45 32 83 38 25-kkut imaluunniit e-mailiatigut ewb@ghsdk.dk-kkut aamma immikkoortortaqarfimmi pisortaq, Fernando Ugarte oqarasuaatikkut 36 12 42-kkut imaluunniit e-mailiatigut feug@natur.gl-kkut attavigineqarsinnaapput.
Nannut arnavissat inerivissimasut qaammataasakkut nassitsissummik qungasequtserneqartarput, nassitsissutit ukioq ataaseq sinnerlugu nannut ingerlaarnerat malinnaaffigineqarsinnaavoq. Assiliisoq Kristin Laidre
Angutivissat nannullu inerivissimanngittut siutaatigut qaammataasakkut nassitsissuserneqartarput. Nassitsissutit qaammatit arfinilinniit arfineq-pingasut tungaanut nannut ingerlaarneri malittarineqarsinnaapput. Assiliisoq Kristin Laidre
