Angakkussarfimmi ph.d.-ngorniarlutik ilinniartut pikkorissartut Saqqummersinneqarfia 05.05.2012
Maajip ulluisa tallimaat, 2012
Qeqertarsuarmi Angakkussarfimmi apriilip naalernerani ulapputtunnguaqarpoq, tassami Nunani Avannarlernit tamanit Ph.d-mik ilinniagaqartut Qeqertarsualiakaasimammata tassani upernalernerani immap naasuaraasa naajoraleruttorfianni qanoq pinngoriartortarnerat ilinniarniarlugu.
Angakkussarfimmi tappiorannartunik misissuisarfik puiaasaasanik sullukitsunik, milluaateeqqanik, imermillu misissugassanik sumi tamaani ulikkaarpoq, ilisimatuunngorniarlutillu ilinniartut Nunanit Avannarlernit tamaneersut maani ulappupput.
“Maaniipput ilisimatusarfinneersut Danmarkimit, Sverigemit, Norgemit kiisalu Finlandimeersut aammattaarlu peqataasut ilaat ataaseqNew Zealandimeerilluni” taama oqaluttuarpoq pikkorissaanermi aqutsisoq Torkel Gissel Nielsen, DTU Aqua Danmarkimeersoq, taannaavorlu Ph.d.-mik pikkorissarnissamik pilersitsisoq maani upernaakkut suut tamarmik naajoraleruttorfianni ingerlatsinissamik.
Pikkorissarnermi pikkorissaasussat ilagaat Kristine Arendt aamma Thomas Juul-Pedersen, Nuummi Kalaallit Nunaanni Silap Pissusiata Allanngoriartorneranik Ilisimatusarfimmeersut, taakkuupput Diskobugtip imartaani uumasut nerisaqaqatigiiaat pillugit immikkut paasisimasaqarluartut, namminneq ilisimatusarsimanertuk tunngavigalugu.
“Periarfissatsialaavoq ilisimatuut allat oqaloqatigisinnaassallugit taamatullu aamma malinnaavigissallugit suliatta assinginik nunani allani qanoq sulisoqarnersoq, aammattaaq nuannerpoq ilisimatusartut atuartissallugit,” Kristine Arendt oqarpoq, Thomas Juul-Pedersen peqatigalugu upernaap nassatarisaanik immami naasut qanoq pinngoriartortarnerat aammalu tamatuma kingunerisartagai pillugit ilinniartitsisuusoq, assersuutigalugu naasut taama naajorartut ilaat amerlaqisut kingunnit nerineqartarput, amerlaqisullu allat immap naqqanut kiviinnartarput, taamaasillutik ilaatigut kinguppannut uillunullu iluaqutaallutik.
Ilinniartitsisut Kristinekkut Thomasillu saniatiguttaaq ilisimatuut Spaniamit, Svalbardimit, Islandimit Danmarkimiillu atuartitsiartortut aamma Angakkussarfimmiipput.
Nammineq misilillugu
Ilisimatusarlutik pikkorissaqataasut inini atuartitsivinni aammalu tappiorannartunik misissuiffimmi ilinniartinneqarput, tamakkuli saniatigut aamma namminneq imaani misissuillutik misiliissapput Angakkussarfiup angallataa Porsild atorlugu angalaarlutik, misissugassaminnik katersillutik taamaalillutik immap uumasuisa minnerpaat ilisimatusarfiginissaat suliarissallugu, soorlu immap naasui aamma kinguit qanimut suliaralugit misissussallugit.
“Immap naasui upernaakkut naajoralersarput, upernaakkut siku aserortileraangat seqernullu qinngornerisa imaanut pitarussinnaanngorneraniit, ukiumiit ukiumut piffissami allanngorartumi pisartumi. Taamaattumik uagut iluatsitsilluartutut oqaatigineqarsinnaavugut, tassami piffissaq eqqorluarlugu maaniikkatta, immap naasuisa amerlalluinarlutik naajoraleruttorfianni, taamaammallu misissugassat ilisimatusartunit ilisimatusarnermullu ilinniartunit amerlaqaat” professori oqaluttuarpoq, nammineq halvfemsikkunnili akuttunngitsunik Angakkussarfimmi ilisimatusarluni suliaqartarsimasoq.
Ilisimatuutut ilinniartut ataatsimut suliassanik sisamanik ilisimatuutut misissugasanik pilersaarutigineqartunik suleqatigiissuteqarput, ulluni qulini pikkorissarnerup ingerlanerani naammassiniagassaminnik. Tamatuma saniatigut pisussaapput ikioqatigiillutik nerisassiornerit niuerniarnerillu suleqatigiissutigissallugit. Taakkuinnaalluunniit marluk periarfissiipput suleqatigiissinnaanermut ilinniarnissamut aammalu ilisimatuunik allanik suleqateqarsinnaanermut sungiusarfiulluni, tassami matuma kingorna nunarsuarmi ilisimatuunik allanik sumiluunniit suleqateqarsinnaanermut sungiusarfiulluni attavissiillunilu.
“Pissanganartorujussuuvoq maani nunap avannaarsuani issittumi sulineq, uagut nammineq ulluinnarni sulinitsinni sungiusimasatsinniit allarujussuarmik misigiffiulluni. Aammattaarlumi uagutsinnut periarfissiivoq ilisimatuunik allanik ilisimatuutullu ilinniartunik oqaloqateqarsinnaanitsinnut, suliatta assinginik sumiiffimmili allami suliaqartunik.” Taamatut naliliivoq ph.d.-mut ilinniartoq Mie Hylstofte-Sichlau, ulluinnarni DTU Aqua Danmarkimi ph.d.-nngorniarluni allaaserisaqarluni sulisoq.
Ph.d-mik pikkorissarneq Angakkussarfimmi ingerlanneqartoq aningaasatigut Nordforskimit (Nunat Avannarliit Siunnersuisoqatigiivinit) tapersersugaavoq.
Ph.d-mik ilinniagaqarneq sunaana?
Ph.d.-mik ilinniagaqarneq ukiunik pingasunik sivisussusilimmik ilisimatusarluni ingerlanneqartarpoq. Taamatut ilinniarnerup nalaani pikkorissarnerit immikkut siunertaqartut ingerlanneqartussaapput, assersuutigineqarsinnaavoq maanna maani issittumi Angakkussarfimmi ingerlanneqartutut ittoq, kisiannili ph.d.-mik ilinniagaqarnerup annertunersaa tassaasarpoq inuup nammineq ilisimatusarnikkut ingerlatsivia saqqummiussassanngorlugu suliassaq. Maannakkut ph.d.-mik suliaqartut maannalu Angakkussarfimmi pikkorissartut tamarmik immikkut imaani kinguit pillugit ilisimatusaateqartuupput, immap uumasuaranngui immap naasuinik nerisaqartuusut, taakkulu namminneq immap uumasuinit allanit, soorlu aalisagaaqqanit nerineqartartuusut, taamaasillutillu pingaaruteqartorujussuullutik kinguppaat, aalisakkat, arferit allallu tamaaniittut amerlassuujullutik piunissaannut.
Paasissutissat allat sukumiinerusut:
Professor pikkorissarnermillu pilersitsisoq ingerlatsisorlu Torkel Gissel Nielsen, DTU Aqua (Torkel Gissel Nielsen Qeqertarsuami Angakkussarfimmiissaaq majip 7-iata tungaanut. Atassutearfigineqarsinnaavorlu oqarasuaat angalallattagaq aammalu e-mailikkut) Oqarasuaat angallattagaq: +45 25 58 06 57 e-mail: tgin@aqua.dtu.dk
Allaaserisaq manna suliarineqarpoq Line Reehmit, DTU Aquami aviisiliortoq, ire@aqua.dtu.dk
Immap (kumaa) kinguk Calanus hyperboreus uumasuarannguuvoq upernalernerani immap naasuisa naajoraleruttorfianni tamakkuninnga inuussuteqartartoq, tassalu maannarpiaq Diskop Kangerliumanersuani inuulluataalivissimasoq. Assiliisoq Russ Hopcroft
Qeqertarsuarmi Angakkussarfik apriilip naalernerani nunanit avannaamioqatigiinneersut ph.d.-nngorniat ilisimatusaatigalugu pikkorissarnerminni katersuullutik qiterisaat. Assiliisoq Line Reeh.
