Immap naqqanik sajuppillatsitsisarnissat qilalukkanik qernertanik misissuititsilerput Saqqummersinneqarfia 31.07.2012
Uuliasiorfiutileqatigiiffiit Shell, Mærsk aamma ConocoPhillips Baffin Bugtimi siunissami uuliasiortoqalersinnaanera siunertaralugu immap naqqanik sajuppillatsitsisarluni misissuinernik augustimiit ingerlatsiniarput. Taamaattumik Aatsitassanik Pisortaqarfiup Pinngortitaleriffik Danmarkimiittorlu DCE qinnuigai pingaartumik Qimusseriarsuarmi qilalukkanik qernertanik misissuinissanik suliaqaqqullugit. Misissuinissat pineqartut pingasunik immikkoortortaqarput aallartissallutillu julip naanerani imaluunniit augustip aallartinnerani naammassiniarneqarlutillu september 2012-ip naanerani. Misissuinissat ilaat ingerlanneqartussat immap naqqanik sajuppillatsitsisarluni misissuinerit ingerlanneqarnerisa nalaani nipit pilersinneqartut immap iluani ingerlaartarnerinik paasisaqarnerunissamik aqqutissiuussiniartussaapput. Misissuinerit ingerlanneqartussat allat tassaapput immap naqqanik sajuppillatsitsisarnerit sioqqullugit, ingerlanneqarnerisa nalaani kingornalu Baffin Bugtimi qilalukkat qernertat sumiinnerannik paasiniaanissat peqatigitillugulu takusat amerlassusiannik kisitsinerit. Misissuinissat immikkoortut pingajuannik taaneqarsinnaasoq tassaavoq Qimusseriarsuarmi piniariartartut ilisimasaannik katersineq, tassa tamatuma avataani immap naqqanik sajuppillatsitsisarnerit ingerlanneqarnerisa nalaani.
Misissuinernit paasisat 2013-ip ingerlanerani saqqummiunneqarnissaat naatsorsuutigineqarpoq.
Nipip ingerlaartarnera
Misissuinerit arlallit takutereerpaat qilalukkat qernertat nipinut qisuariartartut aammalu inuit pilersitaannut nipinut malussarissuusut. Kisiannili nipip nunatta imartaani immap iluani ingerlaartarneranik paasissutissat pigineqartut annikitsuaraannaapput. Baffin Bugtimi misissuinissanit paasissutissat sukumiisut katersorniarneqarput, taamaalilluni immap naqqani sajuppillatsitsisarnerit pilersitaannik nipit immap iluani ingerlaartarnerisa sunniutigisinnaasaat pillugit naatsorsuutinik tunngaveqartumik siunissami ilimasaaqquteqartalersinnaanissaq anguniarneqarluni. Taamaattumik bøjit immiussissutitallit assigiinngitsut Baffin Bugtimi inissitsiterneqassapput, taakkulu immap itissusaanni assigiinngitsuni nipit siaruaattarata sakkortussusianik immiussissapput. Immiussat tunngavigalugit Baffin Bugtimi immap naqqani sajuppillatsitsisarnernit nipit siaruaattarnerat takussutissiorniarlugu naatsorsuusiortoqassaaq.
Qernertat kisinneqarnissaat
Qimusseriarsuarmi Baffin Bugtimilu qilalukkat qernertat amerlassusiat sumiissusiallu tamaani immap naqqani sajuppillatsitsisarluni misissuinissat sioqqullugit, ingerlanneqarnerini kingornalu nalunaarsorneqassapput. Peqatigitillugu qilalukkat qernertat siaruarsimanerattaaq nalunaarsorneqassaaq takuniarlugu immap naqqanik sajuppillatsitsisarluni misissuinerit pissusilersuutaannut sunniuteqassanersut.
Taamaaliornissani timmisartoq Twin Otter atorneqassaaq alaatsinaattullu sisamat ilaassapput. Imartat qulangiuaarneqartussat siuningaani aaqqissuunneqariissapput, taakkulu taaneqatarput transekter. Aamma imartaq qulangiuaarneqartoq videomik assileerummik immiunneqassaaq qernertat amerlassusiannik kisitseqqissaarnermut imartallu sikoqassusiannik takussutissiisussamik. Timmisartumik qulangiuaarinissat pissapput julip naanerani, augustip naanerani aammalu septemberip naanerani.
Qimusseriarsuaq qilalukkat qernertat aasaanerani najortagaasa pingaarnerit aapparaat aappaa Qaanaap eqqaani Inglefield Bredningimiilluni. Qilalukkat qernertat Qimusseriarsuarmut annguttarput julip naanerani tamaaniittarlutillu septemberip naanissaata tungaanut.
Piniartut ilisimasaat
Immap naqqanik sajuppillatsitsisarluni misissuinerit qilalukkanut qernertanut kingunerisinnaasaasa paasisaqarfiginiarneranni piniartuttaaq ilisimasaasa ilannguneqarnissaat pingaartorujussuuvoq. Taamaattumik aasarmanna immap naqqannik sajuppillatsitsisarnerit nalaani qilalugarniartarnerannit ilisimasaannik nalunaarsuinerit, qernertamik pisaqarniarnerminni piffissaq atorneqartoq, pisaqarfigisimasat imaluunnit piniarniarnerminni eqqumiiginarsinnaasunik misigisinnaasaannik piniartut paasiniaaffigineqassapput. Qimusseriarsuarmi piniarianik apersuisoqartassaaq, taamaalilluni piniartut Savissivimmeersut Kullorsuarmeersullu apersorneqartassallutik. Aamma qernertanit pisarisimasaannit misissugassanik katersisoqassaaq.
Piniartut peqatigalugit misissuinissat pissapput augustip qiteqqunneraniit septemberip qiteqqunnerata tungaanut.
Itinerusumik paasisaqarusunnermi saaffigisassat:
DCE-mi:
Line Kyhn, mail: lky@dmu.dk imaluunniit Jakob Tougaard, mail: jat@dmu.dk
Pinngortitaleriffik:
Immikkoortortami pisortaq Fernando Ugarte oqarasuaat +299 361242 imal. +299 262357 imal. feug@natur.gl imaluunniit
Seniorforsker Malene Simon (nipip siaruaattarnera) oqarasuaat +299 361200, imal. masi@natur.gl imal.
Seniorforsker Mads Peter Heide-Jørgensen (kisitsinertaa piniartullu ilisimasaanik katersineq) oqarasuaat +45 32833827 imal. mhj@ghsdk.dk
