*Required
*Required
*Required
*Required
*Required
*Required
*Required
*Required
Send
Thank you for your application!
 

Immap naqqata aalariaasaa pillugu speciale nutaaq Saqqummersinneqarfia 29.06.2012

Specialeliorluni Syddansk Universitetimi (SDU) ilinniartup, Heidi Sørensenip biologimi specialeliani maajip aallaqqaataani 2012 tunniuppaa, juunillu 28-ani illersuinermini angusilluarsimaneranik kalerrinneqarpugut. Heidi maanngaanniik pilluaqquarput.

Speciale suliarineqarsimavoq  SDU-p Kalaallillu Nunaanni Silap Pissusianik Ilisimatusarfiup akornanni suleqatigiissutigineratigut, Professor Ronnie N. Glud, Prof. Bo Thamdrup aamma Prof. Søren Rysgaard ilisimatuutut siunnersuisoralugit. Taamatut ilisimatusarnerminut atatillugu Heidi Sørenseni qaammatini qulingiluani (9-ni) Nuummiissimavoq Silap Pissusianik Ilisimatusarfimmi sulilluni.

Silaannaap allanngoriartonerata malitsigisaanik ukiuni kingulleni qulikkaani issittup imartaani immap sikuusarnera annikilliartorsimavoq. Isumaqartoqarporlu tamatuma kingunerisaanik immap naqqani uumassuseqartunik kinnernik pinngoriartortoqarnera annertusiartortoq. Tamatumalu sunniutaanik immap naqqani uumassusillit assigiinngitsut agguataarnerat ineriartornerallu sunniutilimmik allannguuteqarsimassasoq.

Ilusilersukkatigut takutinniarlugu siumut takorloorutigineqarpoq, issittup avannarpasinnerpaartaani taamatut silaannaap allanngoriartornera ingerlaannassappat piffissap ingerlanerani ima allanngoriartortigisinnaasoq issittup kujasinnerusortaannut assersuunneqalersinnaalissallutik. Taamanna pissutigalugu pingaaruteqarluinnarpoq issittup kujasinnerusortaani pissutsit qanorlu ilusilersugaanerat ilisimasaqafigissallugit. Tamatumunnga atatillugu Nuup kujatinnguaniittoq Kangerluarsunnguaq misissuiffissatut toqqarneqarsimavoq assersuusiorfiginiarlugu. Heidi Sørensenip specialeliornerminut tunngatillugu misissuinemini immap naqqani piffissakkuutaartumik allanngoriartornerit qanoq iluseqarnersut (immap naqqani ingerlaatsit) misissorsimavai, kangerlunnut allanut issinnerusumiittunut nunanilu kiannerusuniittunut assersuunniarlugit.

Heidip specialeliaani paasinarsivoq Kangerluarsunnguaq tassaasoq issittup kiannerusullu akornanni inissisimasoq, taamaasillunilu siunissami kiannerulissappat issittumi kangerluit naqqisa qanoq isikkoqalernissaannut tikkuussisuusinnaasoq aammalu paasisaqarfigineqarsinnaasoq.

Ilisimatusarnikkut immikkut suliaq tassaavoq pilersaarummut annertuumut ilanngullugu suliarineqartoq, Syddansk Universitetip, Silap Pissusianik Ilisimatusarfiup Hollandimilu Nederlands Instituut voor Ecologie (NIOOKNAW) suleqatigiinnerisigut ingerlanneqartoq.

Speciale uani takuuk