Issittumi ilisimatusaatissarpassuit aallarteriarsinnaanngorput Saqqummersinneqarfia 16.11.2012
Assimi: Proffessori, Canada Excellence Research Chair Søren Rysgaard, ASP-imi siuttoq. Assiliisoq: Peter Bondo Christensen.
Kalaallit Nunaaniit, Danmarkimiit Canadamiillu ilisimatusartartut Issittumi 2017-ip tungaanut ilisimatusaatissanik peqatigiilluni suleriarineqartussanik pilersaarusioqatigiipput. Tamanna pivoq Issittumi ilisimatusarnikkut peqatigiit, Arctic Science Partnership, ASP-p siullermeerluni ukiumoortumik Canadami Gimli-mi ulluni 12.-16.- november 2012 ilisimatusartartunik ataatsimiititsinerani.
Ilisimatusartartut 100-t sinnerlugit amerlassuseqartut tamarmillu ilisimatusaatigineqartartuni immikkut ilisimasaqartuusut Issittumi sumiiffinni arlalinni ilisimatusaqaqatigiissutigisassaminnik ataqatigiissaaripput piareersaallutillu. Sumiiffiit ilisimatusarfigineqartussat tassaapput Nuup kangerlua, Young Sund Tunup avannaarsuaniittoq, Qalasersuup avannnarliup imartaani sumiiffiit arlallit, Baffin Bugten kiisalu Canadami Hudson Bugten-imiit Fox Basin-imut.
Ilisimatusaqatigiinnikkut anguniarneqarpoq Issittumi silap pissusaata allanngornerata kingunerinik ilisimatusarnikkut iluaqusersoqatigiilluni paasisaqarnerunissaq kiisalu taamaattoqarnerata nunarsuup sinneranut sunniutigisinnaasaanik paasisaqarnerunissaq.
”Iliuuseqarnissaq pisariaqarluinnarpoq. Issittumi ukiuni makkunani allanngoriartuutit annertoorujussuupput sukkasoorujussuarmillu allanngoriartortoqarpoq. Ukiormanna aamma aatsaat taama imaani sikuunikitsigeqqippoq. Issittumi aasaanerani imaani sikuerulluinnarnissaa siunissami ungasittorujussuunngitsumi pisinnaavoq. Taamaalisoqarpat nunarsuup avannaatungaa tamavimmi sunnerneqartorujussuussaaq, ASP-mi siuttuusoq professor Søren Rysgaard oqarpoq.
Ilisimatusaatissarpasuartigut nutaatigut ilaatigut misissorniarneqarpoq imaata sikuata amigaataalerneragut imaani uumassuseqassuseq sunnerneqassanersoq kiisalu imaani sarfat anorillu aaqqissuussaanerat allannguuteqassanersoq. Nunami nunap qeriuaannartup aanneragut sunniutissai kiisalu silaannarsuup nunallu ataqatigiinnerisa qanoq sunnerneqarsinnaanerat ilisimatusartartunit misissuiffigineqassaaq. Aammattaaq Issittumi inuuniarnikkut atugarisat aammalu nappaatit atugaasut misissuiffigineqartussanut ilaassapput. Ilisimatusartartut ilaasa Issittumi allannguutit nunarsuup sinnerani sumiiffinni assigiinngitsuni silap pissusianut tunngatillugu ataqatigiissutsit itisilerlugit misissuiffigissavaat.
Peqataasut 130-it missaaniittut assiliteqatigiinnerat, Kalaallit Nunaanniit, Danmarkimiit Canadamiillu Gimlimi peqataapput. Assiliisoq: Peter Bondo Christensen.
2013-imi ilisimatusartartut siulliit misissuisussat Nuummiissapput, tamaani sikumi pissutsit, silaannarsuup immallu kuldioxid-imik akoqassusiisa ataqatigiinnerinik misissuissallutik. Immap sikuata qimagunnerata kingorna ilisimatusartartut allat inuunermi pinngitsoorneqarsinnaanngitsunik immami, nunami silaannarmilu pissutsinik paasisaqarnerujumallutik misissuillutik aallartissapput. Aammattaaq sermersuup aakkiartornera tamatumalu imaani sarfat kaaviiaarnerinut uumassuseqassutsimullu sunniutigisinnaasai misissorneqassapput.
Tunup avannaarsuani Young Sund-imi suliniutit aallartinneqassapput Qalasersuup avannarliup imartaa 2015-imi misissuiffigineqassaaq. 2016-imi. Ilisimatusarnikkut suliniutit Hudson Bugten-imi Fox Basin-imilu ingerlanneqartussat 2015-imi pinissaat anguniagaavoq, Baffin Bugten alakkarteriffigineqassalluni 2017-imi.
Kalaallit Nunaata, Danmarkip Canadallu ASP-mi suleqatigiinnerat pilersinneqarpoq juli 2012 peqatigiinnissamik isumaqatigiissut Nuummi atsioqatigiissutigineqarmat.
ASP-mi suleqatigiinnerup ataani nittartagaq www.asp-net.org saqqummiunneqaqqammerpoq. Tassani ilisimatusartartut nunarsuup avannaani avatangiisini allanngoriartortuni iliuuserisaat, angusaat, oqaluttuassaallu malinnaaffigineqarsinnaassallutik.
Itinerusumik paasisaqarusunnermi saaffigisassaq:
Professor Søren Rysgaard oqarasuaat email: sory@natur.gl
