*Required
*Required
*Required
*Required
*Required
*Required
*Required
*Required
Send
Thank you for your application!
 

Issittumi suleqatigiinneq nutaaq aallartippoq Saqqummersinneqarfia 09.03.2012

Qaamanerup uteqqilernerani upernariartornissaanullu ullut maani issittumi atuutsileruttortut nunarsuarmi silap pissusianut ilisimatusarnermi siuttuusut aamma issittuliarlutik aallararput – tassa Tunup Avannaarsuanut.

Tamatumunnga tunuliaqutaasoq tassaavoq ilisimatuut assigiinngitsunik ilisimatusaatillit piffimmut ataatsimut kateritsinnissaat, taamaasillutik ataatsimoorlutik suleqatigiinnikkullu paasiniaanikkut pissutsinik siornatigut ilisimaneqanngitsunik nunarsuarmi silap pissusianut taassumalu allanngorneranut sunniuttartunik paasisaqalernissaq.

Paasiniaanissat tamakku Young Sundimi Ittoqqortoormiinilu qaammatini  marlunni-pingasuni ingerlanneqassapput, tassalu  Issittumi Ilisimatusarnermi Suleqatigiinneq, una takuuk, Nunatsinni Canadami Danmarkimilu silap pissusianik ilisimatusarfiit suleqatigiinnerat taamaasilluni aallarnerneqassalluni.

Kunngeqarfiup Danmarkip Issittoq Pillugu Iliuusissaa 2011-2020-mut piviusunngortitsinissamut ilapittuutaavoq, ilisimaneqartutut Danmarkimit Kalaallit Nunaannit Savalimmiunillu 2011-mi atsioqatiginnissutaasumut. Issittoq pillugu iliuusissani kunngeqarfimmi ullutsinni periarfissat unammilligassallu pingaarnerit,  suullu naalakkersuinikkut suleqatigiissutigineqartussatut siunniussassaasinnaanerat eqqartorneqarput. Nunatsinni Silap Pissusianik Ilisimatusarfik Nuummiittoq, tamatumani qitiulluinnartumik inissisimavoq soorlu aamma Nunatta Canadallu akornanni suleqatigiinnermi taamatut inissisimasoq.

2010-miilli Silap Pissusianik Ilisimatusarfik nammineerluni University of Manitobamik suleqatigiinnissamut isumaqatigiissuteqarsimavoq, tassungalu ilaliullugu 2011-imi Aarhus Universitetimi ”Center for Arktisk Forskning”-eqalernissaanut sulissuteqartoqalersimalluni, Silap Pissusianik Ilisimatusarfimmut University of Manitobamillu qanimut suleqateqartussamik.  Taamaasilluni nunarsuarmi silap pissusianik ilisimatusarnermi siuttut, immikkut issittumi silap pissusianik ilisimatusartut ataatsimut suleqatigiiffigisinnaasaminnik periarfissinneqalissallutik, issittup annertussutsikkut pingajorarterutingajaani ilisimatusarnissaminnut. Issittumi Ilisimatusarnermi Suleqatigiinnermi silap pissusiata imermit pisunut (tatsit, siku, sermeq, nuna qerisoq il. il) uumassusileqatigiiaanut inunnut taakkulu pioqatigiinnerannut tunngasut misissuivigalugit suliarissavaat. Siunertaavoq sulinermi apeqqutit pingaarutillit sammineqassapput.

Pilersaarutaavoq issittumi sumiiffinni assigiinngitsuni taamatut suliaqaqatigiittarnissaq ukiut tamaasa ingerlanneqartassasoq.

Uuttortaatinik sikup ataanut ikkussuisut. Assiliisoq: Peter Schmidt Mikkelsen

Sikumik qillerisoq. Assiliisoq: Peter Schmidt Mikkelsen