*Required
*Required
*Required
*Required
*Required
*Required
*Required
*Required
Send
Thank you for your application!
 

Kalaallit Nunaata imartaata saarulliinik ilisimatusartoq nersorniarneqartoq

Assimi: Nina Overgaard Therkildsen nunatta imartaata saarulliisa tunngaviusumik sananeqaataannik DNA-nik ilisimatusarnini pillugu 2012-imi oktobarip ulluisa 25-ani DTU-mit nersorniarneqarpoq. Nersornaatip taaguutaa: Young Researcher Award. Atlantikup saarulliisa (Gardus morhua) DNA-vinik ilisimatusarneq pillugu pilersaarusiaq Silap Pissusianik Ilisimatusarfimmi sila eqqarsaatigalugu Atlantikup saarulliisa siunissami periarfissat pillugit pilersaarusiap ilagaa. DTU-mi pisortaq Martin P. Bendsøe nersornaammik tunniussisuuvoq. Assiliisoq: Birgitte Røddik

DTU Aquami ilisimatusarnermik suliaqartoq Nina Overgaard Therkildsen nunatta imartaata saarulliisa kingornuttakkatigut sananeqataannik, DNA-vinik, ilisimatusarnini pillugu qanittukkut DTU-mit nersorniarneqarpoq. Nersornaatip taaguutaa: Young Researcher Award, nunatta imartaata saarulliisa DNA-vinik ilisimatusarneq pillugu suliniutaavoq Pinngortitaleriffimmi Silap Pissusianik Ilisimatusarfimmi silap pissusaata allanngoriartornera eqqarsaatigalugu Atlantikup saarulliinut sunniutaasinnaasunik paasisaqarnerujumalluni suliniummut ilaalluni.

Silap allanngorneranut saarulliit naleqqussarsinnaassusiat Ninap ilaatigut misissorsimavaa. Saarulliit sananeqaataasa ilisimatusarfigineqarneranni periutsit nutaajunerpaat atorlugit Nina misissuisimavoq.

Saarullit uumasut DNA-vinik (Pinngortitaleriffimmi ilisimatusartunit aamma najukkani aalisartunit katersorneqarsimasut) ilaatigut Pinngortitaleriffimmi piffissami sivisuumi saarulliit siunnaanik katersorlugit misiligutissanik sanilliussinikkut Nina Overgaard Therkildsenip saarulliit kingornuttakkamikkut assigiinngissuteqartut siammarsimanerat qulaajaaffigisimavaa. Misissuinernit paasineqarpoq saarulleqatigiit immikkoorlutik imminnullu attuumassuteqaratik suffissartut ikinnerpaamik sisamaasut. Pingasut nunatta imartaani suffisartut, ataatsillu sinerissap qanittuani suffisartut. Ataatsit Islandip imartaaneersut ilaanneeriarlutik nunatta imartaanukartartut imartatsinnili suffisarnissaannik ilimagineqanngitsut. Paasisat nutaat pissutigalugit nunani tamalaani imartanik misissuisarnerit pillugit siunnersuisoqatigiit ICES (Det Internationale Havundersøgelsesråd, ICES) 2013-imut nunatta imartaani sinerissap qanittuani 8000 tonsinik saarullittassiisoqarnissaanik siunnersuisinnaasimavoq.

Kiisami saarullittassiisoqarsinnaaneranik siunnersuinermut tunngassuteqartoq  allaaserisaq aamma atuaruk, tassani avataani sinerissallu qanittuani saarullittassiissutissanik siunnersuinerit immikkoortinneqarsinnaalernerinut peqqutaaqataasut sammineqarput.

Pinngortitaleriffimmi saarulliit siunnaannik katersat nutaannginnersaat 1908-meersuupput. Siunnat tamakku umiarsuarmit ”Tjalfe”-mit 1909-mi katersorneqarput. Assiliisoq: Kaj Sünksen

DTU Aqua-mi kingornuttakkat pillugit ilisimatusartoq inuusuttunnguaq taanna maannakkut Pinngortitaleriffimmi ilisimatusartut peqatigalugit nunatta imartaata saarulliinik aqutsinermi angusat ajornannginnerusumik toqqaannartumillu atorneqarsinnaasunngortinniarsarai. Ilaatigut sukkasuumik misissueriaatsimik ineriartortitsinikkut, misissueriaaserlu taanna atorlugu sarulliit saarulleqatigiinnut sorlernut ilaasuunersut aalajangerneqarsinnaavoq.

Suliniut Pinngortitaleriffimmi Silap Pissusianik Ilisimatusarfimmi Atlantikumi saarulliit silap pissusiata allanngoriartorneranik sunnerneqarsinnaanerat paasisaqarfiginiarlugu ilisimatusarnikkut suliniutip ilagaa. Ninap ph.d.-nngorniutini 2012-imi augustip ulluisa 17-ani Danmarks Tekniske Universitetimi illersorpaa. Ph.d.-nngorniutaata taaguutigivaa: “Insights from the past. Retrospective monitoring of genetic variation in Atlantic cod (Gadus morhua)”.

Ilisimatusartoq inuusuttunnguaq taanna maannakkut Villumsfondenimit doctorinngorniarnerminut aningaasaliissutaasut atorlugit USA-mi Standford Universitetimi ukiuni marlunni misissuilluni tunngaviusunik paasissutissanik suliaqarnerminik nangitsisinnaalerpoq. Tassani aalisakkat kingornuttakkamikkut sananeqaataannik ilisimatusarneq atorlugu aalisakkat kingornuttakkamikkut aalisarnermit qanoq sunnerneqartarnerat paasisaqarfiginiassavaa.