Nipisanniarnermi mitertarineqartartut pisiarineqarusupput Saqqummersinneqarfia 30.03.2012
Nuup eqqaani nipisanniartillutit miternik pisarisuugaqaruit Pinngortitaleriffik attaveqarfigissavat. Apriilip qaammataani miternik 300-nik ataaseq 40 koruunilerlugu pisisarniarpugut. Meqqit Nuup eqqaani miternik pissatanik amerlassusiliinissamut atorneqassapput. Tamanna timmissat pillugit nalunaarut eqqarsaatigalugu Aalisarnermut, Piniarnermut Nunalerinermullu Naalakkersuisoqarfimmit immikkut ittumik akuersissutaavoq.
Mitersissagutta meqqinut nassiunneqartunut paasissutissat arlallit ilanngunneqarsimassapput. Paasissutissat pineqartut tassaapput pisaqarnermi ulloq, GPS malillugu sumiissuseq, piniarfigisap atia, qassutit aalisarnermi atorneqartut amerlassusiat, qassutit nal. ak. qassit ningisimaneqarsimanersut, qassuserfiusup itissusiata missaa aamma qassutit suut atorneqarnersut (nipisanut, puisinut il.il. qassutit).
Meqqit ataasiarluni qassusiarnermi pisarineqartut TAMARMIK Pinngortitaleriffimmit tiguneqarnissaat pingaaruteqarpoq, mitertarineqartut ilaannaat pinnagit.
Pinngortitaleriffimmi attaveqaataasut tigusisussallu:
Peter Hegelund, Maia Olsen & Sofie Ruth Jeremiasen
Pinngortitaleriffik, oqarasuaat 36 12 00
Meqqit qanoq amerlatigisut amerlasoortaqarnersut paasiniarneqarnissaat aamma siusinnerusukkut kisitsisinut sanilliunneqarnissaat siunertaralugit katersisoqassaaq. Pissatat qanoq amerlatiginersut Nuummi ukiut qulit sinnilaarlugit matuma siorna misissuiffigineqarput taamanikkullu meqqit inersimasut 30 %-ingajaat pissaanneqarsimallutik amerlasoortaqartut paasineqarput. Taamanikkumiilli miterniartarneq annikillingaatsiarsimavoq taamaattumillu pissatat aamma ikilisimanissaat naatsorsuutigineqarpoq. Tamanna ilutigalugu amerlasuut aqerlunik sanaat Kalaallit Nunaanni atorneqarunnaarsikkiartuaarneqarnissaat pilersaarutigineqarmat ukioq 2012 killiffiliiffigissallugu eqqortuuvoq. Taamaalilluni ukiut arlallit qaangiuppata amerlasuut saviminernik sanaat eqqarsaatigalugit pissaasarnerni ajornartorsiutit misissuiffigineqarsinnaalissapput.
Meqqit katersorneqartut Pinngortitaleriffimmi misiligutissaasivimmut ilanngunneqassapput, tamakkulu miternik allatut misissuinerni pingaaruteqartuussallutik. Meqqit ukiut qulit matuma siorna katersorneqartut aamma misiligutissaavimmiitinneqarput tamakkulu allanut tunngatillugu atorneqartarput.
Pilersaarusiaq pillugu amerlanerusunik paasissutissanik pissarsiniaraanni attaveqarfissat:
Ilisimatusartoq angajulleq, Flemming Ravn Merkel, oqarasuaat 361200
e-mail: flme@natur.gl
imaluunniit
Immikkoortortaqarfimmi pisortaq, Fernando Ugarte, oqarasuaat 361242 e-mail: feug@natur.gl
Mitit puisinut qassutini pisarineqarsimasut. Foto: Bo Bergstrøm
Nuup Kangerluani aalisartoq. Foto:Lars M. Rasmussen
