Nunatsinni arferit pillugit ilisimatusarneq nunarsuarmiunit soqutigineqaqaaq Saqqummersinneqarfia 11.10.2012
Ilisimatusartartunit Pinngortitaleriffimmeersumit, Danmarkimeersumit kiisalu Skotlandimeersumit qipoqqaat neriniartaasiat pillugu paasissutissanik nutaanik saqqummiussisoqaqqammerpoq. Taakkua arfernut nalunaaquttanik nipputtartunillusooq ikkussillutik arferit aqqaamanerminni pissusaannut tunngassuteqartunik paasisaat nunarsarmi tamarmi tusagassiuuteqarfinnit ilisimaneqarluartunit Discovery Channel-imit, National Geographic-imit danskillu nutaarsiassaqartitsiviini alutorsaatigineqarlutik sammineqarput.
– Immaqaana arferit alutorineqartaqimmata paasisavut tusagassiuutinit taamarsuaq soqutigineqartut aammami taamatut suleriuseqarnerput tassalu atortorissaarutit atorlugit uumassuseqassutsip paasiniarnera alutorineqarsimasinnaavoq, Pinngortitaleriffimmi ilisimatusartartutut atorfeqartoq Malene J. Simon oqaluttuarpoq nangillunilu:
– Aammami Kalaallit Nunaat ukiuni makkunani isiginiarneqartorujussuuvoq silap pissusiata allanngoriartornera peqqutaalluni. Amerlasuuttaaq paaserusuppaat siunissami arferit qanoq pisinnaanissaat. Tamakkulu saniatigut allaaserisarput ilisimatuussutsikkut atuagassiami tutsuiginaateqarluartumi saqqummersinneqarpoq, tassani Kalaallit Nunaanni uumasut annerpaartaasa ilaata immap iluani pissusilersuutigisartagaanut tunngassuteqartunik paasissutissanik nutaanik saqqummiussiffigalutigu.
Qipoqqaat pillugit ilisimatusarnernit inernerit tuluit ilisimatuussutsikkut atuagassiaanni “The Journal of Experimental Biology”-mi ullumi saqqummiunneqarput. Malene J.Simon Aarhusip Universitetiani professor, Peter T. Madsen, aammalu professor Mark Johnson, University of St Andrews-imeersoq, peqatigalugit allaatigisamik saqqummiussipput.
Qipoqqaq neriniartilluni issariarnermut 3-4 meter nikittarpoq, allerorsuani angingaartut – aatsaraangami allerua alleq qalasianut killittarpoq – aatsartiinnarlugit imaq 30 tonsinik oqimaassuseqartoq sukkangaartumik oqummiuttarlugu. Naak imarmik taama oqimaassuseqartumik qanermioqaraluarluni ingerlarsuinnartarpoq issariarnermut 1 meter nikittarluni uffali ingerlaarnermini immap naqitsinera annertusiartortoq assoraluarlugu. Qarngi matugaangamiuk imaq aniatilersarpaa ingerlaajutigaluni nerisarluni tulliani aatsaqqinnissami tungaanut. Taamaaliorluni qipoqqaap imaq nalunaaquttap akunneranut 1000 liter oriaqattaarsinnaasarpaa.
Paasissutissat nutaat ilisimatusartartut Issittumi uumassuseqassutsip ataqatigiinnerata allanngoriartornerata arfernut sunniutigisinnaasaanik siulittuuteqarniarlutik naatsorsuusiortarnerminnut ilanngussinnaalerpaat.
Aqqartarnernik uuttuutit (D-tags) arfernut ikkunneqartarput pissusaat akunnikkaarlugit paasisaqarfigilluarumallugit. Asseq: Fernando Ugarte
Immap qaani qipoqqaq nerisoq. Asseq: Fernando Ugarte
Ilisimatuussutsikkut allaaserisaq Malene J. Simon-imut saaffiginninnikkut PDF-nngorlugu pissarsiarineqarsinnaavoq.
Paasisat pillugit Aarhusip Universitet-iani paasissutissiisartumit Camilla Nissen Toftdal-imit allaaserineqartoq uani atuarneqarsinnaavoq.
Itinerusumik paasisaqarniarnermi saaffigisassaq:
Pinngortitaleriffimmi ilisimatusartartoq Malene J. Simon oqarasuaat 361200, mbl. 583933 imal. masi@natur.gl
