Pinngortitaleriffimmi ilisimatusartoq siammarterisarnini pillugu nersorniarneqartoq Saqqummersinneqarfia 13.01.2012
Carsten Egevang, Ph.d. aamma Pinngortitaleriffimmi ilisimatusartoq ullumikkut Namminersorlutik Oqartussanit Avatangiisinik Pinngortitamillu Mianerinninneq pillugu nersornaatisitinneqarpoq. Københavnimi Islands Bryggemi inini kusanartuni Kalaallit Nunaata sinniisaata Naalakkersuisunut ilaasortap Anthon Frederiksenip oqalugiarnermini Carsten Egevangip ilisimatusakkaminik pinngortitamilu assilisaminik annertuumik siammarterisarnera pingaartillugu oqaatigaa.
Novembarimi Carsten atuakkamik assiliartalersorluakkamik, Grønland – dyrenes og menneskenes land, saqqummersitsivoq. ”Assiliisartutut atuakkiama nuannarineqarluarnera soorunami nuannaarutigaara tulluusimaarutigalugulu. Ilisimatusartutulli uanga suleqatimalu angusaasa sapinngisamik inunnut amerlanerpaanut siammarterneqarnissaat uannut pingaaruteqartorujussuuvoq,” Carsten Egevang qungujulalluni oqarpoq. ”Uanga uumasut pissusilersortarnerannik ilisimatusartutut aamma Pinngortitaleriffimmi timmiaqatigiikkutaat assigiinngitsut pillugit paasissutissanik katersisartutut ukiumut qaammammi ataatsimimi marlunniluunniit assersuutigalugu Tunup Avannaani Sandøen-imiittarpunga imaluunniit Qeqertarsuup Tunuani Kitsissuniittarlunga. Taamaalillunga kusanarluinnartunik assiliinissannut periarfissaqartarpunga aammalu assiliisarneq ilisimatusarnerup saniatigut aliikkutaralugu suliaasoq eqqaassallugu uannut pingaaruteqarpoq, tassami suliakka uppernarsarniarlugit assiliisarlernikuugama. Kisianni uagut ilisimatusartutut suliat tikillugit misissuiffimmiitilluta uumasut pissusilersuutaat ima ilikkartigisarpavut allaat assiliiortornissanut pilersaarusiorsinnaalluta, taamaaliornissarlu takornariamut assiliisartumut ajornarluinnarpoq – aliikkutaralugu inuussutissarsiutigaluguluunniit assiliisartumut.”
Carsten Egevangip Imeqqutaallat Kalaallit Nunaanniit Sikuiuitsumut Kujallermukartarnerat Kalaallit Nunaanilu erniorfissaminnut uteqqittarnerat pillugu ilisimatusarnera 2010-mi januaarimi nunarsuarmi tamarmi takuneqarsinnaavoq, ilaatigut Carstenip nittartagaq www.arctictern.info sanasimammagu aammalu imeqqutaallat aallartarnerat pillugu angusat siammarterneqarnissaannut aaqqissuussisimanera pissutigalugit, taamaalilluni nunarsuarmi tamarmi tusagassiortunit takuneqarsinnaasunngorlugu. Tamatuma kingorna nunani tamalaani katersugaasivinnik nittartagaatilinnillu pinngortitaq pillugu siammarterisunik arlalinnik suleqateqartoqalerpoq. Københavnimi Experimentariet-imi nunarsuup assingani ammalortumi inuttut angitigisumi piviusuusaartitamilu imeqqutaallat nunarsuarmi tamarmi nallerneqarsinnaanngitsumik ingerlaartarnerat, immat sarfaat, innermik anitsinerit allarpassuillu malinnaaffigalugit takuneqarsinnaapput.
”Soorunami ilisimatusarneq aamma nutaaliorneq apererusussutsimik akissuteqarfigineqarusussutsimillu ingerlatsisuupput. Ilisimatusarnerli uannut aamma siunertaqartorujussuuvoq. Namminersorlutik Oqartussat pisuussutinik uumassusilinnik aqutsineranni Pinngortitaleriffimmit siunnersuisarnissaq ilaatigut suliassaavoq. Suliat tikillugit sulisimagaangama timmiaqatigiikkuutaallu kisitsiffigisimagaangakkit taava ilisimasat tamakku aqutsinermik suliaqarnermut ilanngunneqartarput tamakkulu timmiaqatigiikkuutaanut inunnullu tamakkuninnga inuussutissarsiuteqartuusunut iluaqutaasarput. Tamanna suliaavoq iluarisimaarnarluartoq, ingammik ilisimasat tamakku inunnut pinngortitamik atuisuusunut kisiannili uatsitut ilisimatuutut aqutsisutullu attaveqarnitsinni oqaatsinik atuisinnaanngitsunut siammarterneqarnerat iluatsikkaangat. Atuisut eqqaamaneqarnissaat pingaartuuvoq, ” Carsten Egevang erseqqissaavoq.
Carstenip nersornaaserneqarneranik Pinngortitaleriffimmit pilluaqquarput aammalu taassuma nutaaliortarnerata siammartererusunneratalu atorluartuarnissaat Pinngortitaleriffimmi qilanaaraarput. Carsten Egevangip piffissami matumani nittartakkakkut isaaffik ilaatigut qaammataasanut nassitsissutit allatullu nalunaaqutsersuinerit Pinngortitaleriffimmit suliarineqarsimasut pillugit sumiissusersuinernik siammarterisartussaq suliaraa.
Atuakkamik assitalersukkamik naliliineq: Grønland – Dyrenes og menneskenes land. Carsten Egevangimit
Carsten Egevang appaliarsuit erniorfianni assiliinissaminut piareeqqasoq – pisimasoq Carstenip atuakkiamini pinngortitami oqaluttuassaanngitsumik assitalerneqarsinnaanngitsumilluunniit misigisani tupinnartoq pillugu eqqaasaa. Assiliisoq: Marie Frandsen
Terianniaq atuakkami ”uumaniallaqqissorsuartut” allaaserineqartoq. Assiliisoq: Carsten Egevang
